أنا بنت، وبـ تعرض للتنمر كل يوم
عشان بلبس صليب
الناس بـ تزغرلي
بحاول على قد ما أقدر أتجاهلهم، بس هم مبالغ فيهم جدًا
عمري ما أبديت أي رد فعل تجاه أي حاجة بـ يعملوها
بس الطريقة اللي بـ يبصولي بيها بـ تحسسني كأنهم عايزين يقولولي:
"إزاي جاتلك الجرأة تلبسي صليب؟"
وفي ناس بـ يجزوا على سنانهم، ويتعصبوا
الناس نسيت إننا في 2019
والمفروض يكون فيه حرية
من حقي ألبس صليب
ده جزء من هويتي الدينية
بالمناسبة في نسبة من الناس دي من طبقة عالية، في التجمع، وأغنية،
أنا مش بـ قول إن كل الأغنية كده،
بس أنا عايزة أوضح إنه الموضوع مالوش علاقة بمستوى الناس،
وهي العقلية.
وأنا أصلًا بطبعي في حالي، وبـلبس حشمة،
وبـ مشي دايمًا في الجامعة، والشارع، وأي حتة في حالي،
بس بجد الموضوع بدأ يزيد عن حده.
وأنا عيلتي بـ يدفعوا لي آلافات في تاني أكبر وأغلى جامعة في مصر،
عشان ما يحصليش كده، وبـ تعرض لده كل يوم في الجامعة.
ده غير إن فيه بنت قعدت تهين ديني قدامي بمنتهى الجرأة،
وهي مش شايفة إنها بـ تعمل حاجة غلط.
وأنا في الأول كنت هادية معاها، بعد كده اضطريت إني أرد عليها،
وأفهمها إن مش من حقها تقول كده.
في ناس بـ تخاف تحكي،
بس مش المفروض إن البني آدم يخاف.