­­يمكن معظمنا واحنا لسه قبل ما نتجوز
بـ نبقى مش فاهمين أوي الأم عملت إيه لينا، ومش مقدرين.
ما عندناش الوعي الكامل إننا نقدَّر هي عملت إيه.
كنت بـ زعل منها في حاجات كتير أوي زي أي حد في السن بتاع الجامعة وثانوية عامة.

في أول حمل ليا وأنا بـ ولد،
- أنا ولدت طبيعي، كانت ولادة مأساوية جدًا-
أول ما فتحت عيني قولت لها: "ما تزعليش مني"،
ما سألتش على البيبي،
أول حاجة بصيت لمامتي، وقولت لها: "ما تزعليش مني".

عدت الأيام، وكل شوية بـ فهمها أكتر، وكل شوية بقيت بـ تحول لها،
بقيت أقول لولادي الحاجات الـلـي كنت بـ زعل منها فيها، بـ عملها دلوقتي مع ولادي.
بـ حاول أعمل فلترة شوية لحاجات على حسب الزمن والوقت الـلـي إحنا فيه،
بس برضه بـ لاقي نفسي في الآخر ساعات بـستخدم ألفاظ هي كانت بـ تستخدمها كتير جدًا.

كنت رايحة الشغل مرة الصبح، وبـ سمع نجوم أف أم،
كان قريب من عيد الأم،
فـقالوا إحنا عاملين هدايا لـلـي هـ يحكي لنا قصة لطيفة عن الأم.
بعت قصة الولادة بتاعتي دي،
لاقيتهم كلموني، قالوا لي أنتِ كسبتي معانا فاوتشر ما أعرفش بكام.
أنا مش قادرة أقول لكم هي كانت منبهرة إزاي،
يعني إزاي أنا خليتها مبسوطة، قد إيه إن أنا حكيت عنها.

أنا دايمًا بشوف مامتي حنينة طبعًا وكل حاجة،
بس بـشوفها ضعيفة، مش بـ تستحمل حاجات كتير في الدنيا.
بـ قعد أنقد فيها: "يا ماما اجمدي"، يا ماما مش عارف إيه، بـ تعيط بسرعة جدًا.
بعدين أنا دلوقتي بـ لاقي نفسي أنا الشخص ده،
عمالة بـ داري إني الشخص ده، الـلـي ممكن أي موقف يتعبني،
أنا زيها بالظبط، بس أنا عاملة إني جامدة.
في حقيقة الموضوع، يعني أنا ممكن أخش الحمام، وأصوت، وأعيط، واخرج،
وكأن مفيش حاجة يعني، ما حصلش حاجة.

هي كانت برضه بـ تشتغل،
كنت أقعد أقول:
"يا مامي أنتِ ليه مش قاعدة معانا زي الأمهات في البيت؟"
أنا اشتغلت برضه وعملت زيها،
ولما اشتغلت مفيش حاجة ينفع تبقى 100% مظبوطة،
هو أنا لو هـ شتغل هـ شيل من كفة البيت سِنَّة،
ولو نزلت النادي وديت العيال هـ شيل من كفة الشغل سِنَّة،
يعني مفيش حاجة بـ تمشي 100%،
كنت طول الوقت فاكرة إن هي إمكانياتها ضعيفة.

أنا أم لـ 5 أطفال، كان عندي 3 أطفال، ومن سنة ربنا رزقني بتوأم.
عمري مع الـ 3 أطفال الأولانيين ما قولت لها تعالي اقعدي معايا وساعديني، عمري.
يعني الولاد بـ ينزلوا الحضانة من بدري عشان أنا عندي شغل.
أنا ما كنتش عايزة أتقل على مامتي، وعشان مامتي ما تستحملش،
أنا كنت معتقدة كده، إن هي ما تستحملش.

لكن حقيقة الأمر إن ربنا فهمني حاجة تانية خالص،
إن بعد ما جيبت التوأم، وبعد ما هي طلعت معاش في السنة الـلـي أنا جيبت فيها التوأم،
هي دلوقتي الـلـي قاعدة مع ولادي، أنا من غيرها ما كنتش هـ نزل الشغل.
مش عارفة ليه البيبيهات دي بالذات مش قادرة أتخيل إن أنا أوديهم حضانة،
يعني أخواتهم نزلوا حضانة، بس دول لأ، دول أنا خايفة عليهم بزيادة.
هي الـلـي قاعدة معايا، وهي الـلـي واقفة جنبي.
كل ما تحس إن أنا تعبانة، تقول لي:" لأ، اجمدي"
هي الـلـي بـ تقويني دلوقتي، فأنا بقيت مامتي.