أنتوا قولتوا إن الأحسن ليا إني أكون في مدرسة بنات،
قولتوا لي ما أقرَّبش من حد شعره قصير، وسمعت الكلام.
مفيش نوادي، مفيش رحلات، ممنوع الكلام مع قرايبي الولاد.
ممنوع أروح أماكن ممكن أتعامل فيها مع أي مخلوق يشبه لهم أصلًا.
أنا فاكرة مرة من المرات النادرة الـلـي روحت فيها لسنتر دروس خصوصية،
كانت أول مرة أشوف ولد من سني.
كنت في ثانوي، وكانت صدمة كبيرة لما عرفت إن الولاد في سني بـ يطلع لهم دقن.
كلهم قعدوا يتريقوا عليا لما ندهت على واحد منهم بـ"عمو"، بس معلش،
إزاي المفروض أعرف إن الشخص الـلـي مستخبي ورا الشنب ده، ولد عنده ستاشر سنة؟
عمري ما قريت في ولا كتاب إن صوت الولاد في سن المراهقة بـ يكون عالي، ومزعج كده كأنه هليوكوبتر.
الموضوع كان مخيف جدًا، لدرجة إني كنت هـ عيَّط،
وهربت من المكان ده، وما رجـعـتـلـهـوش تاني أبدًا.
لما روحت الجامعة بقى علاقتي بالرجالة انتهت تمامًا.
اكتشفت هناك إني ظاهرة نادرة، الناس ما بقتش تستخدم كلمة "محافظة" خلاص.
كنت مضطرة أتجنب البنات كمان؛ عشان كنت مرعوبة أسمع كلمة "أعرَّفِك؟".
دلوقتي أنا عندي 25 سنة،
وكل الـلـي فاكراه إني كل مرة حاولت أتعامل فيها مع راجل كنت هـ تجنن.
إزاي بعد كل ده عندكوا الجرأة تقولوا عليا معقدة؛
عشان رافضة الشيء الـلـي بـ تقولوا عليه "عريس"؟