كان عندي 10 سنين أول مرة جت لي، وكان ليلة امتحان في خمسة ابتدائي،
كنت فاكرة إن الدورة الشهرية دي معناها إنها بـ تقعد شهور، وإني خلاص مش هـ قدر ألعب تاني.
عمري ما كنت عايزة أكبر، حتى وأنا أصغر من كده،
فـكان كابوس إني كبرت غصب عني.
عيطت كتير فشخ، ودعيت ربنا كتير فشخ إنها تروح،
وقعدت كذا سنة بعدها مخبية على ماما إنها بـ تجيلي.
كنت بـ لاقي البادز في البيت، واخبيها، واستخدمها وقت ما تجيلي،
ولو مفيش، كنت بـ ستخدم أقمشة، وتعمل لي إلتهابات، وكنت بـ تبهدل؛
كنت مرعوبة حد يعرف.
علاقتي بيها دلوقتي أقل تعقيدًا، ما بـقـيـتـش بـ تكسف منها،
ولا معتبراها حاجة غريبة، مجرد حاجة مزعجة.
لو فيه فرصة أتخلص منها بعملية من غير ما هرموناتي تتأثر، هـ عمل ده.
ما بـ شوفهاش حاجة مقدسة، ولا حاجة مقرفة، ولا أي حاجة غير إزعاج.
رغم إنها جت لي وأنا طفلة، وكان ألمها بشع، إلا إنها دلوقتي بـ تيجي أيام قليلة،
وبكثافة قليلة، وبألم قليل. فأنا ممتنة لده.