ما كـنـتـش عارفة إن التى - شيرت قصيرة…وفجأة حسيت، وأنا نازلة من العربية، إن فيه حاجة غلط!
لأ... هو ما كانش فيه حاجة غلط
بس أنا حسيت إن جزء منى عريان، لمجرد إنى ما خبيتش اللى أنا متعودة أخبيه كل يوم
وفضلت طول وانا ماشية عندى هاجس إن فيه حد هـ يلمسنى
هـ ييجى من ورايا وفجأة يقرص طيزى، ويضحك ويجرى!
تكرار لمشهد حصلى من أكتر من ٨ سنين وانا ماشية مع بنت خالتى
كنت أرفع من كده ١٠ كيلو مثلا
ومحجبة، ولابسة بنطلون، وعليه توب
عدى، قرصنى، وضحك وجرى
أنا فضلت واقفة فى مكانى، ما نطقتش، ما اتحركتش
هى فهمت اللى حصل، وجريت وراه. بس أنا ما نطقتش، ما اتحركتش.
أنا مش بخاف منكم
مش بخاف تلمسونى، أو تقولوا لى كلام أبيح
أنا بخاف من نفسى ... بخاف أقف ما أنطقش، وما أتحركش