كنت في صيف أولى إعدادي على البحر مع أهلي وقرايبي
وفي الشمسية اللي جنبنا واحد حسيت إنه مختلف
وكنت شايفة إنه بـ يحاول يقرب
لكن طبعا ما كنتش أقدر أعمل أي حاجة
بعدين قمت أتمشى شوية
فـمشي ورايا وبعده مامته قامت منادياني:
"انتِ في سنة كام؟"
"أنا في أولى إعدادي"
كان ماما وبابا اتحركوا وانا بس اللي موجودة
وسألتني اسمي وقلعت خاتم فضة واديتهولي
"خدي ده أنا عايزاكي تاخديه وهو كمان عايزك تاخديه
انتِ جميلة أوي وهادية"
وبعدين لما ماما جت قعدت تتكلم معاها
وما فهمتش هي قالت إيه لماما
بعدها كنت بـ خد جيراني اعذبهم
نروح مشي من فيكتوريا لإستانلي عشان أبص عليه
وهم مش فاهمين حاجة،
وأول ما يحاول يقرب يكلمني أقول لهم: "يالا نمشي"
لحد ما في يوم جارتي قالت لي: "انت بـ تجـيـبـيـني هنا ليه؟"
قلت لها: "عشان نتفرج على البحر"
قالت لي: "ما تكلميه وتخلصينا"
"لأ ما هو مش هـ ينفع …"
"طب بـ تجيبينا ليه؟ بصي بقى احنا آخر مرة نيجي،
أنا رجلي بـ توجعني،
هو هـ يجي كالعادة ويحاول يكلمك، ما تمشيش"
وأول ما جه وبدأ يتكلم ويقول حاجات حلوة
أنا قلت: "يالا نمشي يالا نمشي!"