"ازاي سبتيه يعمل كده؟ ازاي وافقتي؟"
أنا ما سبتهوش! أنا عمري ما سبت أي حد يعمل أي حاجة ..
أنا حقيقي مش بفهم الناس اللي بتقول "ليه وافقتي يحصل كده"
هو الراجل اللي بـ يضرب مراته مثلا بيسألها قبلها: "لو سمحتي ممكن أضربك؟"
ليه فيه افتراض إن عشان حاجة حصلت يبقي هي وافقت عليها
أنا ما وافقتش لأنه ما سألنيش أصلا …
كنا مخطوبين وعلي وشك نتجوز، وبنقضي وقت طويل سوا في الشقة اللي هـ نتجوز فيها
كان يومها أصلا متضايق مني وانا ما حاولتش أصالحه
كنت مطمنة له وجوا بالي بقول حتي لو حصل حاجة مش مشكلة، ما احنا كده كده خلاص هـ نتجوز
بس فاكرة إنه لما ابتدي يقرب مني أنا حسيت بحاجة غريبة وما كنتش مبسوطة
قلتله: "لأ بلاش"، بس ده ما فرقش معاه
هو ما سألنيش وقتها ولا أي وقت تاني إذا كنت عايزة ده أو لأ
عمره ما سأل ولا فكر، وانا ما أدركتش ده غير متأخر
قرب مني وباسني بدرجة من العنف
وبعدها ابتدي يكمل، في الأول كنت بقاومه وبقوله" "لأ بلاش", " مش دلوقتي"، "مش هـ ينفع"
وبعدها بطلت أقاومه وقلت لنفسي خلاص سيبيه هو عايز كده اديله اللي هو عايزه
بعدها كرهته وكرهت نفسي …
عدي سنين قبل ما أبتدي أفهم إن اللي حصل ده ما كانش عادي
وإن ده جسمي مش شوكولاته، مفيش حاجة اسمها أديله حاجة أنا مش موافقة أديهاله
بس أنا كنت ضعيفة، كنت حاسة إن جسمي مش ملكي