أنا بـ حس إن عيالي بـ يقلقوا مني عشان كنت محبوسة
بـ حس إنهم مش بـ يعاملوني كـأمهم لأ كـواحدة عادية بالنسبة لهم
وأخواتي بـ يقولولي: "آه ما انت دخلتي السجن"
"انت أسلوبك بقي أسلوب السجن"
مع إني ولا بـ شتم ولا بـ عمل حاجة من الحاجات دي خالص
وبـ حس ناس كتير خايفين مني
يعني زي امبارح كان عندي تنجيد بنت أخت جوزي
وروحت المنطقة اللي كنت ساكنة فيها قبل ما أتحبس
لاقيت ابني بـ يقولي:
"انت جيتي هنا ليه انت مش عارفة إن الناس هنا عارفة إنك كنت محبوسة؟"
قولتله: "إيه يعني كنت محبوسة،
آه كنت محبوسة وكنت محبوسة في مخدرات وما عـمـلـتـش حاجة غلط
حبيت أجيب لكم قرش، حبيت أوكـلــكــم وألـبـسـكـم أحسن حاجة بدل ما أمشي في طريق تاني"
بـ حس من عيون الناس إن أنا مش كويسة
مش عارفة هو إيه يعني واحدة كانت مسجونة
فيها إيه أقل من أي واحدة في الدنيا
أنا بني آدمة عادية بـ عرف كل حاجة في الدنيا
بس المستوي اللي احنا عيشنا فيه هو اللي عمل فينا كده
ليه ما كناش في مستوي كويس ومستوي راقي
كان ممكن أبقي أحسن
بس أنا المستوي اللي عايشة فيه عاجبني
بنت بلد وجدعة وممكن أقف في أي حتة
وانزل أتكلم مع أي حد واعرف أعمل أي حاجة أنا عايزاها في الصح
بس نفسي عيالي يحسوا إني ما عـمـلـتـش حاجة غلط
بـ حس إنهم بـ يـعـايـروني وبـ يستعروا مني
أنا ما عـنـديـش أغلي منهم، ونفسي أعملهم أي حاجة
ولو جت علي إني أمشي في المخدرات تاني هـ مشي واعملهم
أنا ما عـمـلـتـش حاجة غلط ولا عمري هـ عمل الغلط ده نهائي
لأني بـبص لربنا قبل أي حاجة
وبـبص إني في يوم من الأيام هـ تحاسب
وانا بـ خاف من حساب ربنا أوي
وربنا اللي عايزه هو اللي هـ يكون.