أنا بشرتي سمراء، وبحبها جدًا، ومن مصر، وأصلي نوبي، بس مش عايشة هناك.
بس عمري ما خلصت من تعليقات الناس في الشارع، أو المدرسة، أو أي مكان بـ روحه،
زي: "شيكابالا"، "أعوذ بالله"، "هي مالها محروقة كده ليه؟"،
"السودان جت احتلتنا ولا إيه؟"، "هي الدنيا ضلمت كده ليه؟".
"سودا بس حلوة"، "إلحق السودا الـلـي هناك دي"، علي أساس إنهم شافوا حاجة خارقة للطبيعة،
"يا واد يا بت"؛ عشان جسمي رفيع،
أو الناس وهي بـ تتسائل قدامي أنا ولد ولا بنت فعلًا، مع إني شكلي بنت، وصريح كمان،
بس هم بـ يستظرفوا.
كل ده بـ يخليني أمشي بسرعة وانا لوحدي، وبـ بقى محرجة وأنا ماشية مع ناس تانية.
ولو ماشية مع حد بشرته غيري، فـ بسمع تعليقات زي:
"شاي بلبن"، "إيه لم الشامي على المغربي؟"
وانا صغيرة في السن كنت بـ سأل ماما: "هل ممكن ألعب مع الأطفال دي،
ولا هـ يألسوا عليا زي ما كله بـ يعمل؟"، ده كان مأثر عليا جدًا،
وعيشت طفولة وحشة؛ بسببه، وبسبب إن شعري مش ناعم،
وبـ سمع تعليقات زي: "إيه سلك المواعين ده؟"، واضطريت أفرده؛ عشان بس أبقى مقبولة اجتماعيًا.
دلوقتي المهم إني قابلة نفسي، وبحب نفسي، مش مهم المجتمع.
لازم بس الناس تفهم إن الكلام ده بـ يسيب جرح عميق،
وبـ ينزل ثقة أي حد في الأرض، حتى لو كان كل الناس بـ تقوله إن هو جميل.