أخاف أحكي الناس تفتكرني تافهة أو مش كويسة، بس لو عرفوا التفاصيل هـ يفهموا
كان عنده تكنيك كده إن لما يعمل حاجة تضايقني، وانا أتضايق
يقوم هو يعمل زعلان
فـ ألاقي نفسي أنا بروح أصالحه
ما أنا بحبه.
لكن لاقيته بـ يكذب عليا
يـيجى قدام الناس ويـحرجنى، يـتريق على شغلى وآرائي
احنا اتجوزنا عن حب مش عشان حاجة تانية
فلو الحب ده مش موجود، مفيش سبب يـ خلينا نفضل سوا.
ومع ذلك لاقيت كتير شايفين إن ده مش سبب كافي
أتكلم مع أخصائية اجتماعية مثلًا، فـ تقول لي:
"أنا ست ومتجوزة، وبقول لك إيه الـلـي أنتِ بـ تقوليه ده؟
أنتِ مش طبيعية، أنتِ مجنونة
عايزة تـ تطلقى عشان كده؟"
أصل لو أنا هـ تجوز واحد مش بـ يحبني، يبقى هـ فكر في معادلة تانية خالص،
لها حسابات تانية، حسابات مادية واجتماعية
لكن جوازنا ما كانش فيه أي حسابات غير إننا بـ نحب بعض.
بعد ما سيبنا بعض، كنت بـ قعد أتخيل لو كان ينفع أطلع بطاقة أشيل بيها السنين الـلـي قضيتها معاه
نفسي … مش بـ تمني أي حاجة في حياتي قد ما انا بـ تمني إني أقص السنين دي من حياتى.
ساعات بـ قعد أفكر لو هو حبني فعلًا، ولا كان بس بـ يتسلى
بـ تمني إنه يكون كان بـ يحبني حتى لو كان إنسان وحش
المهم يكون كان بـ يحبني، المهم ما يكونش إحساسي كذب.