أنا عندى 27 سنة، من سن 19 سنة سبت بيت أمى وأخدت أخواتى وقعدنا عند والدى.
عشان أمى كانت بـ تضربنا وبـ تقل مننا،
ودايما شايفة إن احنا ملكها وإن هى اللى علمتنا، وإن احنا بتوعها.
لسه فاكرة اليوم ده كويس أوى كأنه امبارح،
اليوم اللى هى اتخانقت معانا على سبب تافه كالعادة وكنا فى رمضان ورمت الأكل فى الزبالة
وقالت محدش يفتح التلاجة أو ياكل النهارده.
ساعتها خرجت أتكلم معاها وشدينا سوا
وضربتنى تانى كالعادة لحد ما كسرت النضارة اللى فى وشى، كانت بـ تضربنى بالبوكسات.
يومها وقفت بعلو صوتى وقلت لها:
"أنا هـ مشى واسيب البيت وأسيبك وهـ خد أخواتى عشان انت هـ تموتينا"
مشيت وأخدت أخواتى البنات، ومن يومها وأنا أم لبنتين.
اشتغلت فى العنف ضد النساء علشان أوقف اللى حصلى إنه يحصل لحد تانى