هو ليه بـ يـتـعامل كده معايا؟
سؤال عمرى ما لاقيت له إجابة لحد دلوقتي
كل فترة بحال، أوقات كل يوم بحال.
كل ما أحس إنى متعلقة بيه، ويظهر بقى سواء فى اهتمام مني أو قلق عليه، بـ يوصله
أو يحس برغبة مني فى التواجد جنبه باستمرار، بـ يبقى غريب جدًا
يبعد، يتعامل بطريقة فيها قلة احترام وقلة قيمة، وكأني تقيلة عليه
وأول ما أحس إني مش عايزاه موجود واتعامل بعدم اهتمام، يقرب
ويكون موجود باستمرار.
هى بس طاقة بـ تـتـصدر، وأكيد بـ يحسها
لكن ولا مرة أخدت فعل، أو رد فعل برفض وجوده
زى إني ما أردش على تليفون، أو أقوله لأ على حاجة.
أنا ليه بـ عمل كده؟
يمكن هو ده السؤال الـلـي مفروض أساله
النهارده جالي إحساس غريب لما اتكلمنا في التليفون
بعد كام يوم من محاولات فشلت بسبب ظروف خارجية
كان غريب، نبرة صوته غريبة
مش مهتم، مش عايز يتكلم
هي يمكن التوقعات؟
أصلي كنت قلقانة على سلامته
واحشني جدًا كان
كنت عايزة أفضل أكلمه كتير، بس رد الفعل كان بارد وجاف وعنيف
زعلت واتوترت.
هي قالت لي إنه هـ يرجع تانى يتعامل بطريقة مش كويسة
ولازم تخرجي من الدايرة دي بأي شكل
أنا عارفة وفاهمة ده، بس مش عارفة أعمل ده ازاى
مش قادرة أعمل ده، مش عارفة أقول لأ
عارفة إنى بـ تأذي، ومش عارفة أقول لأ.
هو بـ يحسسني أغلب الوقت إني صغيرة، ومش مهمة
بـ يشفط كل الطاقة مني، بـ روَّح آخر اليوم مش عارفة أنا مين
أنا مش عايزاه، بس مش عارفة أقول لأ.
إحساس الرفض، وفقد السيطرة من أسوأ الأحاسيس الـلـي خلاني أحسها
لدرجة بقت مؤذية بشكل كبير
خايفة أفكر إن وجوده هو انعكاس كرهي لنفسي.