صحيت في يوم رايح المدرسة زي أي يوم عادي،
لاقيت الناس كلها بـ تـتـريق عليا عشان أنا لابس أكبر تي شيرت وأكبر بنطلون، ووزني زايد عنهم،
ما تسألنـيش الموضوع ابتدى إزاي عشان أنا نفسي مش عارف …
كنت كل ما أرجع البيت لما أشوف نفسي في المراية، مش شايف العيب اللي هـم بـ يتكلموا عليه،
ما كنـتش عارف هو أنا اللي أعمى ولا هم شايـفين حاجة أنا مش شايـفها …
كل يوم الموضوع كان بـ يزيد سوء، كلام سخيف جدا، تصرفات سخيفة جدا
إحساس إنك غير مرغـوب فيك ده أسوء إحساس ممكن تحسه
محدش عايزك، محدش حابّك
كل واحد لما بـ يتحط في موضع اختيار ما بـ يـبصلكش أصلا وكأن انت مش موجود
مع إن التجربة دي ممكن تموت أماكن في قلبك وعقلك، مفيش حاجة ممكن تحيـيها،
بس مع مرور الوقت بـ تكـتسب قوة لا يمكن تـتخيلها، ما بـ يهمكش حد خالص
مفيش حاجة ممكن تجرحك خلاص، انت عديت بأسوء حاجة
بعد مرور الأيام اتغيرت، كان عندي عزيمة للتغيـير لا يمكن تـتخيلها
بعد ما خسيت أكتر من ٤٠ كيلو قابلت البنت اللي حاولت أكلمها
اللي كانت بـ ترفضك بكلام ممكن يجرح الميت، وهي اللي تيجي تكلمك
في اللحظة دي هـ تعرف حقيقة واحدة عن البشرية
البشر مش هـ يحبوك إلا عشان حاجتين: فلوسك وشكلك