وانا ست سنين خرجت مع أمى،
قالت لى إن إحنا هـ نروح نزور ناس ونرجع سوا.
بس أنا ما رجعتش معاها،
امي سابتني هناك ....
كان فيه بيبي اسمها ايمي عندها سنة وناس قالوا لى إن أنا هـ قعد معاهم
عشان آخد بالي منها وأخدمها.
قعدت هناك 9 سنين
أول 5 سنين أمي كانت بـ تيجي تزورني عادي،
بعد كده احتجزوني عندهم وأمي ما بقـيتـش تيجي،
واتقطعت العلاقة لحد ما تميت 14 سنة.
وما كانش فيه ولا مرتب ولا قبض.
الست اللي كنت عندها كانت بـ تلبسنى وتأكلنى كويس،
بس لو مديت إيدي علي حاجة كانت بـ تحرقني بالنار.
مرة حرقتني بالنار عشان أخدت بيضة من التلاجة،
وأخواتها الصبيان كانوا بـ يضربوني بالكرباج،
ياما اتضربت واتحرقت، وياما اتحبست في الحمام،
أنا شفت أيام سودا كتير.
وانا عندي 14 سنة هربت منهم ورحت أدور علي أهلي،
رحت لست كانت بـ تشتغل برضه عند ناس،
ما كانش معايا فلوس فقلعت حلقي اديتهولها، وقعدت عندها شهر.
كان عندها ابن كل يوم بالليل يصحيني مالنوم ويقولي:
"يالا نلعب عروسة وعريس"
وانا كل يوم أصحيها أقولها سكتي ابنك.
أصل الست اللي كنت عندها دي عملت معايا حاجة كويسة،
وانا عندي 13 سنه قعدتني جنبها عالسرير، وكانت أول مرة تعمل كده،
وقالت لي:
"انت دلوقتي كبرتي ما ينفعش تمشي جنب ولد ولا ولد يمسك إيدك هـ تبقي حامل"
المهم لما لاقيتني بصحيها كل يوم بالليل،
قالت لي قومي أنا هـ روحك.
خدتني ورحنا البلد وسألنا علي البيت لحد ما وصلتنى لأمى.

ندمت إني روّحت،
أختي الكبيرة جابت لي هدوم وقالت لي ألبسها.
الهدوم كانت وحشة، هدوم ستات كبار ما رضيتش البسهم،
راحت أختي ضارباني بالقلم،
كان كل الضرب اللي اضربته كوم، والقلم ده كوم تاني،
خلاني فقدت الثقة في أي حد.
الغريب كان بـ يعمل فيا كده بس ازاي أختي تعمل كده؟
بدل ما تقولي حمدلله عالسلامة احنا هـ نعوضك
تضربني بالقلم قدام جوزها؟
بجحت فيها ورديت عليها،
يقوم جوزها ابن عمتي يرد يقول إيه؟
"ما كانش ينفع ترجع من غير ما تكشفوا عليها وتشوفوها بنت ولا لأ.
ما دام بـ تبجح كده تبقي فجرت والله أعلم كانت بـ تعمل إيه"
أمي كانت بـ تزود الطين بلة،
ما تلبسيش كذا، وما تروحيش عند بيت خالك،
وما تروحيش عند أختك …
طب ليه؟؟

من سن 16 سنة نزلت شغل تاني،
بس كنت حرة نفسي، أشتغل واروح.
اشتغلت في بيوت حلوة كتير،
اشتغلت مع ممثلين كتير.
العيل اللي كنت بـ مسكه واسيبه وامشي،
كانت أمه تتصل تقولي ارجعيلي الواد مش قابل دادات تانيين،
الواد بـ يرمي هدوم الدادة مالبلكونة.
كنت بعيش طفولتي معاهم،
كنت لما بلاعبهم بحس كأني بلاعب نفسي

اتجوزت وأنا 19 سنة،
من تاني أسبوع بالظبط عورت نفسي عشان أتطلق.
بعد الجواز بقيت أروح الشغل وأرجع خميس وجمعة.
صاحبة البيت كانت تقولي قمصان نومك منشورة ليه لما انت مش هنا،
أتاريه كان بـ يجيب ستات البيت وانا مش هنا.
ومرة لاقيت انسيال، اتخانقنا وقطعت شرايين إيدي
عشان ضربني.
طب طلقني لأ مفيش طلاق.
انا غضبت ييجي 4 -5 مرات،
كل ما أغضب أهلى يكلموه ويجيبوه تاني،
قلت لأبويا عايز ينام معايا بطريقة مش كويسة،
كلني بالقلم وقالي: انت بنت عرص ازاي تتكلمي في الكلام ده
طب لما ما اتكلمش مع أمي وأبويا هـ تكلم مع مين يا حاج

طبعا بقي ده غير شكمان عربيته اللي اتكسر،
وعلي طول أنا أروح أكتب وصل أمانة للمدام اللي بشتغل عندها، واديله.
مرة 1500 جنيه، مرة 500 جنيه، وحوارت كتير ...
المحفظة ضاعت، الكاوتش اتخرم
أتاريه كان بـ ياخد الفلوس يشتري موبايلات ويتفسح.
يعني انت بـ تاخد من قوتي وقوت عيالي عشان تجيب تليفون؟؟
ما كانش بـ يشيل هم حاجة

لما كنت معاه كان بـ يصر دايما إنه يشربني شاي قبل ما أنزل،
كنت بـ ستغرب إنه بـ يشربني الشاي من غير ما أفطر، ويصر،
بعدها اكتشفت إنه كان بـ يحطلي ½ حباية مخدرات في كوباية الشاي، وشوفته بعيني
كنت بروح أشيل الفيلا 3 أدوار في ساعتين،
مع إنه ما كانش شغلي، أنا شغلي كان العيال بس.
كنت أشيل الفيلا كلها والشغالة كانت بـ تقعد تتفرج عليا كده.
المدام كانت بـ تروح الشغل وانا آكل الفيلا 3 أدوار،
تيجي المدام تسأل الشغالة تقولها خلصتي بسرعة كده،
تقولها أنا ما عملتش حاجة سهام هي اللي كانت بـ تعمل.

اللي لفت نظري بعد 6 شهور إني فيا حاجة هي المدام،
مشت الشغالة وقالت لي هـ زود مرتبك ما انت كده كده بـ تعملي شغل البيت.
مرة بقي ما كانش معاه يحطلي، رحت الشغل وقعت من طولي.
ودوني المستشفي عملوا لي تحليل دم،
لاقيتهم بـ يقولوا لي انت جسمك فيه كمية مخدرات مش طبيعية،
بقيت خايفة وبروح للدكاترة يقولوا لي انت لازم تروحي مصحة.