أنا عندي ١٨ سنة، من ٦ سنين بدأت رحلتي مع العنف الأسري.
أبويا كان بـ يضربني ضرب عنيف جداً لأسباب أتفه ما يكون.
كنت بـ تضرب وانا صغيرة على حاجات من نوعية إني بـ نزل الحمام كتير في المدرسة…
أو إني في مرة قولت لمدرسة عندي، إن أبويا صعب معايا من غير ما أذكر أي تفاصيل.
المشكلة إن الضرب ما كانش عادي إطلاقاً،
كان بـ يقف قدامي ويضربني من ٥٠ لـ ٦٠ قلم مع زعيق وشتيمة وإهانة.
حاول يقتلني مرتين للأسباب التافهة دي، ده وانا عندي حوالي ١٢ سنة.
لما كبرت كبرت مشاكلي معايا، وبدأت تبقى مشاكل عـاللبس مثلاً.
آخر مشكلة كانت إنه عرف إني اتعرَّفت على ولد، مجرد تعارف بس.
فضلت بـ تضرب أسبوعين كاملين، كل يوم بـ يضربني ما لا يقل عن ٦٠ قلم إطلاقاً،
وآه أنا كنت بـ حاول أشغل نفسي وأعدِّهم.
حبسني في البيت وخد موبايلي وكل حاجة.
من وانا عندي ١٢ سنة وهو كل مشكلة يقعد معايا ويقنعني بفكرة الانتحار،
يقنعني قد إيه ده هـ يكون مريح ليا وليهم.
ويقول لي بس بلاش سكينة ودوا عشان ما تتـلحـقـيـش، نطي من البلكونة.
آخر حاجة قالها: "لو خايفة تـنتحري سيبي البيت واهربي، وانا مش هـ دوَّر عليكي".
أنا دلوقتي في ثانوية عامة، مستنية أخلَّصها عشان أمشي،
بس هـ آخد معايا كمية عقد نفسية لا تُعد ولا تُحصى.