ماما الـلـي كانت بـ تضربني دايمًا، بإيديها، والشبشب، والخرزانة….
الخرزانة ما كانش ليها أي استخدام في بيتنا غير الضرب،
على أتفه وأبسط حاجة بـ تضربني من وانا صغيرة.
وعشان أنا أكتر واحدة اتضربت،
طلعت أكتر واحدة في أخواتي بـ خاف منها واعملها حساب.
كانت أبسط حاجة تعملها تقرصني جامد جداً، وجسمي يزرق.
لما كبرت شوية بقت تجيبني من شعري….
مش قادرة أنسى مرة وانا في إعدادي، كنا بـ نشتري حاجة من محل،
وقولت لها: "لأ، مش عاجباني"،
ضربتني بالقلم قدام الـلـي شغال في المحل.
مرينا بعد كده بمرحلة نفسية صعبة لما بابا طلقها وبطل يصرف علينا.
في المرحلة دي، أصبحت أعنف من زمان،
بقيت لما أعيط عشان ضربتني تفضل تضرب فيا؛ عشان أبطل عياط،
فـ بقيت لما اتضرب، أروح استخبى في أوضتي عشان أعيط.
بعدين بقت تخلع باب الأوضة عشان بـ قعد لوحدي واقفل عليا الباب،
عادي من غير مفتاح ولا ترباس، فـ بقيت أضطر أضلم الأوضة،
أقعد في ركن ضلمة أعيط، وامسك صوتي بالعافية عشان ما تسمعش.
ولغاية ما دخلت ثانوية عامة كانت بـ تضربني،
وتجيببني من الطرحة في الشارع قدام الناس،
أو في العربية قدام باب المدرسة، وقدام صحابي.