اتعرضت للتحرش من سنتين،
كنت ماشية في مكان عام، ودخلت من شارع، وحسيت إن في حد ماشي ورايا من فترة،
فـ دخلت من شارع تاني،
وعرفت إنه فضل ماشي ورايا، وانا طبعًا كنت خايفة، ومش عايزة أبص في وشه؛
عشان كان هـ يبان عليا إني خايفه، فـ كملت، ودخلت من طريق فيه كنيسة، وفيها شرطة عشان الأمن،
فـ بصيت ورايا ومش لاقيته، فـ قولت خاف ومشي عشان الشرطة.
اتطمنت شوية، ودخلت شارع تاني، واتفاجئت إنه جي بـ يجري بسرعة عليا،
اتخضيت، وطلعت أجري، وهو بـ يجري ورايا،
وبعدين مسكني، ورفعني، كان عايز ياخدني معاه في شارع تاني صغير كده،
وكان فاتح البنطلون، وانا من خوفي ضربته، وقعدت أنادي على الناس،
واشتمه بصوت عالي، وهو خاف من صوتي، وطلع يجري.
الموقف ده لو حصل معايا النهارده كنت هـ جري وراه، وامسكه، واضربه،
واصوره، وافضحه على مواقع التواصل الاجتماعي،
واستعين بحد من الناس، وآخده على القسم، واعمله محضر،
ومش هـ تنازل عنه أبدًا، وهـ آخد حقي بالقانون.