اتعرضت للتحرش أكتر من مرة، وأول مرة كنت طفلة في رابعة ابتدائي تقريبًا.
كنت راجعة من درس أنا وأختي الصغيرة، وركبت جنب واحد شكله مش مظبوط كده،
ومن أول ما شوفته وانا كنت خايفة أركب جنبه،
بس السواق قالي: "اطلعوا، يالا"؛ عشان العربية تمشي.
فـ ركبنا، وهو فتح البنطلون بتاعه، وكان بـ يعمل العادة السرية،
وانا طبعًا وقتها كنت خايفة، ومش فاهمة إيه الـلـي بـ يحصل، ولا هو بـ يعمل إيه،
ولا المفروض أنا اتصرف إزاي؛ لأن للأسف ما كانش في توعية من الأهل خالص،
وده الـلـي عمل لي صدمة، وما كـنـتـش عارفة أعمل إيه، وما عرفتش اتصرف صح للأسف،
والمتحرش ده كان بـ يتفرج علي فيديوهات إباحية،
وبـ يقولي: "شوفي معايا"، وبـ يحط إيده على رجلي، وأنا أبعد رجلي، ومرعوبة منه جدًا،
وابعد وشي عنه، ولما نزلت من العربية حط إيده عليا من ورا، وضحك.
وانا نزلت، وكنت خايفة، ومصدومة، وبعيط،
ولما وصلت البيت قولت لماما، وهي فهمتني إن ده تحرش،
وإن كان لازم أرد عليه بصوت عالي، وأعرف الناس إنه بـ يتحرش بيا،
واطلب منهم المساعدة. بس للأسف هي فهمتني بعد ما ده حصل وأثر عليا طبعًا.
وده كان أول موقف وأكتر موقف أثر عليا نفسيًا،
وقعدت فتره طويلة بعدها أخاف أركب جنب راجل،
وأي شاب يقعد جنبي أفكر إنه ممكن يتحرش بيا،
وبقيت بخاف من الرجالة عمومًا، وعملي عقدة منهم لفترة طويلة.