أنا قصتي معاها عادية….
وانا في المدرسة، كلمونا عليها،
جت لي وانا في أولى إعدادي، اتفاجئت، وكنت زعلانة أوي،
وبعدها بدأت رحلة وجع، ومغص، وترجيع، وإسهال، وقلق،
وتعب كل مرة بـ تيجي لي.
الحمد لله جوا البيت ما عنديش أي مشكلة؛
كلهم بـ يبقوا عارفين، حتى أخويا الصغير هو الـلـي بـ يجيب لي المسكن لو مفيش في البيت،
وفي رمضان بـ يعزموا عليا ببطيخ وهريسة.
مشكلتي كلها بـ تبقى برا البيت، في الشارع أو في الكلية؛
بـ بقى من كتر التعب مش قادرة، بس مش عارفة أقول إيه؛
خصوصًا لو الـلي بـ تكلم معاه راجل.
ومش عارفة لما أشتغل هـ عمل إيه،
بس أنا بحبها؛ بحسها فيها رحمة لينا، وحماية من أمراض، وحياة،
ومش فاهمة ليه في هجوم ضدها كده.