مش فاكرة أول يوم وتفاصيله أوي، بس فاكرة إحساسي بالخوف من الفكرة،
إني كبرت، وإني هـ تحجب، إني مش صغيرة خلاص، وجسمي هـ يتغير.
حكيت لماما، وقولت لها عشان كنت خايفة ومش عارفة أوي.
إحساس الخوف ده مش حلو، وبـ يكبر معاكِ،
مع إن ده طبيعي، حاجة بيولوجية بـ يمر بيها الجسم، ليه نخبيها ونتكسف منها ونخاف؟
ليه وإحنا صغيرين مش بنفهمها، ونعرف نتعامل معاها،
ومش قصدي في حصة الدين، ولا العلوم، مش معلومات جافة أو حقائق وتشريعات.
لأ، نفهم ال mood swings والألم المصاحب،
ليه بـ تحصل؟ وإيه يحسن المزاج وقتها؟ إنه ده طبيعة الأنثى،
نتعلم مش نتكسف من إعلانات الـ pads وننزل نشتريها عادي.
حاجات زي دي.