بصي حضرتك، أنا مواليد 64
كنت موظفة في وزارة الداخلية في الأحوال المدنية
وبعد كده اتنقلت السجلات المدنية
وكنت متجوزة قبل جوزي ده بس كان تاجر كبير
كنت عايشة عيشة كويسة، بس كان عنده خلل في عقله

كان عنده حاجة اسمها شك، كان أما ييجي يخرج يعلق لي شعراية ويقفل عليا الباب
ولما ييجي يشوف لو أنا خرجت
كان الشك صعب أوي بالنسبة له
ربنا كرمني وكان هـ يرزقني بخلفة جه قال لي: يا انا يا هو
رحت المهم إيه نزلت العيل
وجيت بعد كده ما اتـحـمـلـتـش وانفصلنا وأخدت كل حقوقي
وبعد كده اتجوزت جوزي ده

وأنا كنت بـ شتغل وكان هو قاعد لسه مستني جواب التعيين
زمان بقى كان يسيب لى مثلا مبلغ 15 جنيه كانوا بـ يعملوا حاجة
من 25 سنة كانوا بـ يعملوا حاجة ..
أنا من النوع اللى إيه بيحب يصرف، صريفة
هو بقى لغاية وقتنا هذا اعتمد إن أنا يبقى معايا

ما عندوش فكرة أنا اتصرفت ازاي؟ جبت إيه؟
كان عندي دايما أكياس ميا على المبيض
وفتحت بطني ست مرات، وفي الست مرات أنا كل مرة أدفع مبلغ العملية كله
جيت أما احتجت أعمل أطفال أنابيب أنا اللى دفعت
كان معايا فلوس ومعايا دهب والحمدلله
جيت أما أطفال الأنابيب دي ما نـفـعـتـش
قلت أما أجيب طفل عن طريق الشئون الاجتماعية
فما جـريـش، قالي: انت عايزة هاتى
رغم إن هو اللي كان عنده عدم الخلفة، كان عنده دوالي ورافض يعمل العملية

أنا الى جبت الولد وبقيت أنا الأم البديلة، وتكفلت بيه، أخدته عندي سنة وشهرين
كل ده هو مالوش دعوة أنا اللى أجيب لبس وشرب وأعمل كل حاجة لغاية ما كبر ودخل المدرسة

كنت بـ شتغل لما بدأت مشكلة ابني. أنا كنت بـ بـص لقدام.
الولد ده اما ييجى يكبر الجيران عارفة إن مفيش خلفة. طب اعمل إيه؟
قلت مجرد أما أسجله في دفتر المواليد بس مش هـ عمله شهادة ميلاد،
اعتقادا منى إنى كنت هـ بقى فى الشغل.
وكنت لما يكبر هـ وريه فى الدفتر إنه متسجل كده
واللى أنا كنت حسبته زمان أهو أنا بـ حصده دلوقتى …
هو دلوقتي بـ يقول لي: "ليه أنا اسمى سامح علي وبابا اسمه أحمد؟"
فأنا أقوله إيه: "ده اللى راح سجلك سجلك غلط"
"طب هـ تعملى إيه؟"
"أما تكبر وتخلص الشهادة أنا هـ غيرلك الاسم"
طبعا مش هـ يحصل، بس أنا شايلة هم أما يكبر أو أما ييجي يتجوز
لازم أحكى للأهل، لو انت ممكن تتقبليه عريس لبنتك ممكن غيرك ما يـتـقـبلش
بس غصب عني …

جيت اتحبست عشان سجلت اسمه في دفتر المواليد …
لما خرجت ماكانش معايا فلوس، ابتديت أتجه لإيه؟ لمشوار القروض
الولد عايز دروس ...
أنا عايزاه يطلع كويس عشان أنا برضه أما أموت ما يدعيش عليا
عايزاه ياخد شهادة ويقف على رجليه والله ما عايزة أي حاجة
ومحدش يقوله انت ابن كذا وابن كذا …
مرة حصلت ظروف وابن جارتى قاله انت اسمك كذا، ما تـعرفيش أنا عملت إيه
وجوزي برضه زعق للناس وبهدلهم وشتمهم

نسيت أقولك إنى قبل ما أتحبس كنت شغالة فى مكان كويس،
كنت شارية سنين عشان أطلع بالمعاش،
طبعا ربنا بـ يحبنى أما حصل مشكلة السجن واتحبست سنة وطلعت
السنين اللى اشتريتها عملت معاش مبكر150 جنيه، بـ ينفعني برضه

وكل سنة تبص تلاقيني إيه جددت القرض عشان خاطر ابنى
جوزي ييجى يقولى: بـ تودى المعاش فين؟ أقوله: مالكش دعوة كأنى ما بـ شـتـغـلـش
معاشي شيء ما يـخـصكـش
وبـ يتخانق معايا كتير بسبب الفلوس.
بـ يدينى المصروف وعايز فطار وغدا وعشا وفاكهة ومكواة
واقفة جمبه عشان حصلت له ظروف وعمل بتر فـ رجله، وعنده ضمور فى الأعصاب
وابتديت بقى عينه ما تـشوفـش
بس مهما أعمل واطي، تبص تلاقيه يشتمني ويسبلي الدين ويطردني
مرة اتخانق معايا وجاب أخوه عشان يضربني،
بس أنا ما فـتحـتـش بؤى وما اتـكـلمـتـش، جيراني اللى وقفوا قصادهم
أنا دلوقتي ابتديت أبجح لأن هو ما بـقاش عنده دم،
هو ده من الرجالة اللى عايزة ضرب الجزمة
أنا والله مستنية ثواب من عند الله من ابني مش منه هو
أنا بقولك بـ قلع وبـ لبس وبـ حمي من الساعة ٥ الصبح، أبقى صاحية أفطر وادى علاج،

انا مش منتظرة منه حاجة، أنا منتظرة من ابني يبقى كويس
وبرضه بـ يصعب عليا ابني بصراحة ربنا
يعني ساعات جوزي يغضبه ويقوله: اطلع بات برا الشقة
أروح محضرة شنطة هدومي واقول أنا قبل الولد برا!
هـ وديه فين؟ ده يتيم، أمه وأبوه ميتين فى حادثة، أوديه فين؟
أنا جايباه أعذبه؟ يبقى حرام عليا ...