بـ يتقال لأي بنت "ما ينفعش تـتكلمي بصوت عالي"
لو اتكلمت بصوت عالي وانا ماشية بـ سمع:
"بصي، وطي صوتك لأنك بنت"
أنا مش فاهمة الربط بين بنت، والصوت العالي
أكيد طبيعي لو أنا اتعصبت، صوتي ممكن يعلى
حاجة مش بـ تحكم فيها.

وطبعًا التعبير عن مشاعرنا غير متاح في الشارع
ما ينفعش نضحك في الشارع
ما ينفعش نـتـنـطط، أو نرقص في الشارع
ما ينفعش نغني في الشارع
ما ينفعش حتى نعيط في الشارع
ما ينفعش نعمل أي حاجة في الشارع
و أكيد عيب إننا نحب في الشارع
عيب تمسكي إيد حبيبك
عيب تحضنيه، حتى لو اتجوزتوا
برضه عيب
حتى لو كان أخوكي، أو باباكي مش حبيبك
برضه عيب
المشاعر كلها عيب في الشارع.

كبنت، لما بـ بقى مع ولد وبـ شترى حاجة
أو فى المواصلات، هو الـلـي لازم يحاسب لي
ده بـ يضايقني جدًا يعني عمومًا، ما بـ قبلهاش
بس علشان ما نـشدش مع بعض في الشارع
يا إما بـ عديها، في مقابل إني أجيب له هدية قيمة بعدها
أو بـ بقى عارفة إن الشخص ده عادي،
كلها دقيقتين وهـ نقعد بعدها على القهوة
وانا الـلـي هـ حاسب.

وطبعًا كبنات، مفروض علينا لبس معين في الشارع
وطريقة مشي معينة
أنا فاكرة وانا صغيرة، والدتي كانت بـ تعلمني أفتح بُقي لحد فين
يعني وانا بـ تكلم ما أزودش فتحة بُقي عن مسافة معينة
الـلـي هو كده
و"لازم تـتكلمي كده"، و"لازم تمشي كده"
كتالوج نازل
مش عارفة مين حط الكتالوج ده
وكبنات لسه ما اتجوزناش يعني
ما ينفعش نـتكلم عن حاجات معينة بين بعض في الشارع
وفيه محلات ما ينفعش ندخلها لوحدنا
لازم ندخلها جروب كبير من العيلة
علشان "ما ينفعش تخشي لوحدك، عيب".

ما ينفعش نتكلم عن الميك أب
مرة كنت بـ قول لصاحبتي واحنا ماشين في الشارع
إن "الميك آب حاجة جميلة
وبـ تخلي الواحدة تحس إنها جميلة، والدنيا حلوة"
لاقيت واحد فيه ما بيني وما بينه خطوتين في الشارع، بـ يبص لي كده بقرف
"أنت بـ تبصللي ليه؟ أنا عملت لك إيه؟"