كنت رابعة معهد ومفروض أعمل بحث واقدمه آخر السنة.
فـقررت أعمل بحث علمي عن الجنس.
فـقلت للدكتور: "أنا بـ حضّر لبحث بس خايفة أقدمه يترفض"،
فقال لي: "ليه؟ هو عن السياسة؟" قلت له: "لأ، عن الجنس"
بصلي وبعدين قال لي: "هـ تقدري تعمليه؟ خلاص اعمليه وانا هـ دعمك"

عملت البحث عن الجنس فى الإسلام وباقي الأديان، والجنس فى الفلسفة.
وفي الامتحان الأخير، جت الدكتورة مسكت البحث وقرت العنوان "ما هو الجنس؟"
وسألت: "مين عامل البحث ده؟ طب قوموا لي بقى"
فـقمت أنا والمجموعة اللي كنا عاملين البحث.
"ليه اختارتي موضوع البحث ده؟"
"لأني كنت عايزة اختار موضوع محدش اتكلم عنه وبـ يخافوا يتكلموا عنه"
"وانتِ بقى عينك واسعة وبجحة كفاية إنك تتكلمي عن الموضوع ده؟"
"أيوا حضرتك بس ده بحث علمي"
طبعا زعيق و"اتكلمي عدل، انتِ بـ تتكلمي مع الدكتورة بتاعتك"
وانا ما قلتش حاجة غلط ..
قعدت تقلّب في البحث كده شوية
وبعدين قالت لي: "بصي يا حبيبتي، عشان ما تفتكريش إنك هـ تبقي حاجة في المستقبل،
اللي انتِ عاملاه ده اسمه شغل نسوان،
ده كلام يتقال بين حبة ستات قاعدين مش لاقيين حاجة يعملوها،
يعني انتِ ممكن تغيري عنوان البحث بتاعك وتسميه شغل نسوان"
ما احبطـتـش ورحت للعميد وقدمت فيها شكوى
واتقدمت للتحقيق
ورحت للدكتور اللي قال لي قبل كده إنه هـ يدعمنى
وشاف البحث وقال لي إن ده بحث متكامل وممتاز.
وأخدت امتياز…
لكن مش قادرة أنسي الكلمة اللي قالتها لي الدكتورة:
"أنا هـ سمي البحث بتاعك شغل نسوان"