إحنا أربع أخوات، بنتين وولدين.
ممكن تقول إن علاقتنا ضعيفة ببعض جداً بـسبب الـلـي كان بـ يحصلنا واحنا صغيرين من بابا.
بقينا معقدين تقريباً من الارتباط والجواز وأي حاجة في النطاق ده.
وطبعا بدأ كل ده لما كنَّا بـ نشوف ماما بـ تنضرب قدامنا بالحزام،
واحنا مش عارفين نعمل حاجة غير إننا نعيَّط ونصرَّخ.
كبرنا مع الأيام وكبر فينا الكره للشخص ده،
حتى كلمة بابا بـ تطلع صعبة جداً.
كنت دايماً أقول مش لو أمي كانت منفصلة كنَّا هـ نكون كويسين؟
أصلنا شوفنا جانب من العنف ده برضه…
كنَّا بـ ننضرب بـالحزام وأي حاجة في الطريق، لحد ما أعملها على نفسي.
لحد دلوقتي فاكرة لما كسرلي صباعي وانا صغيرة…
وفضلت يومين ما ودَّانـيـش المستشفى على أساس إنها إصابة عادية، لحد ما طلع كسر.
بس للأسف مفيش ولا واحد فينا هـ يغفر له، لأنه عذب أمي.
كان بـ يسـتـغـلـهـا وياخد منها فلوس ومش بـ يدِّيها حاجة غير فلوس الميا والكهربا،
والباقي هي تـتصرف، حتى مصروفنا واحنا صغيرين ما كانش بـ ناخد،
كانت بـ تدينا على القد.
حالياً إحنا بـ نشتغل وبـ نحاول نعوَّض ماما عن اختيارها الغلط
الـلـي خلَّانا كلنا متعقدين من الحياة دي،
وبدعي ربنا دايماً إنه يـعوضها في الجنة خير،
ويـ عوضنا إحنا كمان على قد العذاب الـلـي شوفناه في الدنيا دي.
في النهاية بس بـ قول إن محدش هـ يعرف الـلـي جواك غير ربنا،
عشان كده جملة "مش هـ نفرح بيكي يا عروسة" بقت كلمة مالهاش تأثير عليا زي زمان .