أخيرًا لاقيت الـلـي أقدر أحكيلهم على تجربتي الـلـي مريت بيها،
من خلال عملي كمُدرسة مسيحية في قرية صغيرة بمحافظتنا،
كل سكانها مسلمين، وطبعًا كنت جديدة عليهم،
وبصراحة كانوا بـ يعاملوني أحسن معاملة.

ولأني الوحيدة الـلـي بـ تدخل القرية، وشكلي كان مختلف،
من حيث إني مش مغطية شعري، وكمان بـ لبس بنطلونات مش عباية زي كل المدرسات،
كنت حريصة على إني ألبس بلوزات بكم وواسعة، وده بحكم المهنة طبعًا.

أول حاجة صدمتني الأطفال في المدرسة،
كان أول مرة يتعاملوا مع مسيحيين
فكنت أثناء الشرح تـسـتـوقـفـنـي طفلة، وتقول لي:
"أنتِ بـ تتكلمي عربي زينا؟
أنا بـ شوف المسيحيين في التليفزيون بـ يتكلموا بالإنجليزي"
فـفهمت إنها تقصد في الأفلام الأجنبية، فـضحكت،
وفهمتها إني مصرية.

أما أغرب موقفين،
الأول لما تلميذ قال لزميله "يا مسيحي" في الحصة،
وجه الولد يشتكي، ويقول لي: "أحمد بـ يشتمني، ويقول لي يا مسيحي"
قولت له: "طب إيه المشكلة، هو أنت مسيحي؟
وبعدين هي مسيحي بقت شتيمة؟"،
قال لي:
"أيوا، أنا مسلم، وموحد بالله"
بصراحة ما بـقـيـتـش عارفة أقول إيه.

الموقف التاني لما دخلت الفصل، وألقيت عليهم السلام
كل التلاميذ ردوا ما عدا تلميذ، ولما الأولاد نبهوني
سألته: "أنا زعلتك يا ابني علشان ما تردش السلام؟"
قال لي: "الشيخ الـلـي بـ يحفظنا قرآن قال لي ما تسلمش على المسيحيين"
وكانت صدمة ليا، وخصوصًا إنه طفل
فـ قولت له: "الكلام ده غلط، لأن القرآن بـ يقول لك إنك تعاملنا كويس،
حتى اسأل أهلك.
وبعدين لو الشيخ قال لك إن المسيحي وحش روح اقتله،
هـ تسمع كلامه؟ مش لازم تحكِّم عقلك؟"
بس أنا ما كنتش عارفة أكمل الحصة من كلام الولد
فـ سألت: "هو الشيخ اسمه إيه علشان أشتكيه؟"، ردوا على إنه تبع الجمعية الشرعية.

حكيت لمُدرسة الفصل، هي بصراحة ما سـكـتـتـش
وبعد مدة قالت لي إنه ما بقاش يـ يجي البلد يحفَّظ الأولاد تاني.

في مواقف تانية هـ بقى أحكيها في وقت تاني ...