أنا اتـعـودت من صغرى على المذاكرة أصلاً، لو ما ذاكرتـش فى حاجة نقصانى … أو بحس بعدم الأمان.
مع كده، بكـره المذاكرة أصلاً!
مهما ذاكرت أمى شايـفـانـى بلعب ومش مهتم بالمذاكرة.
شايفة إن الأنشطة الطلابية، والاجتماعات، والمؤتمرات ملهـاش لازمة!

حاولت أبدله بخالي، بعدين برضه خالي خذلني.
بعد كده بجدي، بعدين جدي اتوفى،
يعني قبل ما أولد على طول،
فـ اتكسرت برضه ساعتها.
بعد كده جمعت إنه لأ،
أنا عاوزة إيه؟ وعاوزة أكون فين؟
الوالدين؛ العائلة؛ المدرسة

فاكرة أول مرة اتجرأت ولبست جينز تاني
كنت بـ ترعش من الخوف
حسيت إني هـ تحول لواحدة تانية
واحدة مش عاجباني، واحدة بـ كرهها،
واحدة دمرت مراهقتي.

المدرسة، المراهقة، معايير الجمال، الجسم

لما كبرت افتكرت مدرس الألعاب اللي كان في مدرستي وأنا صغير
كان حاططني في فريق قرر يسميه فريق البط عشان كل اللي فيه تخان
وأنا كنت كابتن فريق البط

بصوا يا ولاد، أنا طلَّعت البنات لأن فيه أكيد أسئلة شغلاكم، كل واحد ممكن يكتب سؤال في ورقة،
ويطبقها، وانا هرد عليهم ...
في سؤال هنا: إزاي أبطَّل العادة السرية….

ما ينفعش نضحك في الشارع
ما ينفعش نـتـنـطط، أو نرقص في الشارع
ما ينفعش نغني في الشارع
ما ينفعش حتى نعيط في الشارع
ما ينفعش نعمل أي حاجة في الشارع

ميستر خيري طلب مني أجي أقعد معاكم شوية ...
مين فيكم سأل الأستاذ خيري عن معنى الآية "وليحفظن فروجهن"؟؟
مين؟!

أنا بـ درِّس أولى ابتدائي
بـ نزلهم الحمام نظام مجموعات
في يوم جه ولد، وقال لي:
"يا ميس، فلان الفلاني وهو في التويلت
واحد من سنة سادسة أخدوا
وعمل فيه حاجات قليلة الأدب في الحمام".

أول حاجة صدمتني الأطفال في المدرسة
أول مرة يتعاملوا مع مسيحيين
فكنت أثناء الشرح تـسـتـوقـفـنـي طفلة، وتقول لي:
"أنتِ بـ تتكلمي عربي زينا؟

أول ما الجرس ضرب الولاد قفلوا الباب،
أنا كنت في الفصل الـلـي جنبهم
قفلوا الباب، وقفلوا الشبابيك كلها
وهجموا عليها، وقطعوا هدومها
وقعدوا يتحرشوا بيها بشكل فظيع.