مبدئيًا، أنا الـلـي زيي أكيد كتير
أنا بنت بـ تنازع في المجتمع ده باجتهاد وتركيز
أيوا والله باجتهاد وتركيز
إلا إني متضايقة أوي إن شخص زيي وصل لأساسيات الشخص الطبيعي
-الـلـي هي بالمناسبة مش إنجاز في نظر الطبقة الاجتماعية الـلـي بـ شتغل معاها
لأنهم بـ يتصوروا إن أبوكي أكيد الـلـي جابلك العربية أو أي حاجة تانية-
بـ تنجزي لوحدك عشان توصلي لها.
أنا بـ حِس بالإحباط كتير أوي
لأني في مجتمع مش عاوز يحترمني إلا أما يـ شوف معايا راجل
أي راجل، حتى لو ماشية معاه، ومش على علاقة شرعية بيه
المهم إنه يبقى قوي، عشان يقف للأوغاش في الشارع، أو حتى في المناسبات الاجتماعية.
أنا ما زلت آنسة في التلاتينات
بـ شتغل شغلانة كويسة، وبالنسبة لبنات كتير أنا شخص ناجح مهنيًا
-و ده الهدف الخايب الـلـي استهلك مني سنين
عشان أكسب احترام كل الـلـي حواليا، حتى أهلي
عشان أعمل الـلـي أنا عاوزاه بعد كده، الـلـي هو التمثيل-.
أنا بحب التمثيل، و بـ مارسه في الورش الـلـي بـ آخدها
أما بـ عمل مشهد كويس في أي ورشة، ويسألوني:
"إزاي ما مثلتيش من زمان؟"، أو "إزاي بـ تمثِّلي بالصدق ده؟"
ما بلاقيش رد غير إني فعلًا ما بـ مثِّلش
أنا بـ حِس إني بـ مثِّل في الحقيقة
لكن في الورشة أنا فعلًا بـ طلَّع مشاعري الحقيقية
أو الأحاسيس الخاصة بالأشخاص الـلـي بـ قابلهم في حياتي اليومية.
الموضوع بالنسبة لي مش صعب خالص
لكن أنا مش حلمي أبقى ممثلة
أنا نفسي أدرس سيناريو، لأني حاسة إني عندي تجارب
وخبرات شخصية، وأحاسيس خاصة جدَا بـ حسها
وتفاصيل بـ لاحظها في حياتي ممكن أشارك فيها الناس
لو نجحت أتعلم إزاي أعبَّر عنها ببساطة.
