أم علي وحسين

47 سنة، إعدادية
أرملة من 3 سنوات
الأولاد علي 14 سنة، وحسين 11 سنة.

جوزي عرف عن حالته، لكن خبى عليا لمدة سنتين
أواخر التسعينات، أخت جوزي كانت بـ تولد قيصرية
وهو راح يتبرع لها بالدم
لما حللوا الدم بتاعه، عرفوا، بس أنا ما عرفتش
بتوع الطب الوقائي استدعوه كذا مرة
وهو لما سألته ليه بـ يستدعوه قال لي: "طلع عنديه فيروس سي"
بعد كده عرفت إن أخوه وسلايفي كانوا عارفين،
بس أنا وأمه محدش قال لنا.

هو كان من النوع الـلـي ماشي مع زمايله
علاقته الجنسية معايا كانت ضعيفة، كل سنة مرة، وكان بـ يبقى تعبان
أنا كنت بقول له يتعالج، وإن إحنا لسه شباب، ونعيش شبابنا
بصراحة، هو كان طيب جدًا معايا، وحنين فانا ماكـنـتـش بـ قول حاجة.

لاحظت من أول جوازنا حكاية زمايله
وكان عنده مشاكل في الشرج
وأحيانًا في دم في السليب
والحكاية دي منتشرة في عيلته
كان عنده عم بالشكل ده برضه.

بعد حوالي سنتين، الطب الوقائي بعتوا لي واحد
طلب إني أروح أنا والولاد، وقالوا لي عايزينك في الوقائي
لما روحت، قابلت واحدة بـ تشتغل مع الدكتور ع
قالت لي: "عارفة جوزك عنده إيه؟"، قلت لها: "عنده فيروس سي"
قامت طلعت الولاد البلكونة، وقالت:
"لأ، عنده الإيدز، ولازم تروحي تحللي في الحميات أنتِ والأولاد"
عرفت إنهم طلبوا منه يبعتني أنا والولاد، لكن هو كبر دماغه، وما كانش بـ يقول
لحد ما هـم بعتوا لي
طبعًا زعقت معاه، وانهرت
"إزاي تخبي عليا سنتين؟"

لما النتيجة طلعت، بعتت لي اللي بـ تشتغل مع د. ع
وقالت لي: "أنتِ طلع عندك الفيروس، والأولاد لأ"
قلت: "الحمد لله إن الأولاد طلعوا سُلام"
ردت عليا، وقالت: "مين الـلـي هـ يربيهم دول؟ أنتِ هـ تتدمري، وهو هـ يتدمر"
روحت البيت مش طايقة أبص في وشه، ولا أكلمه 3 أيام
قفلت على نفسي الأوضة، وكنت عاوزة أتطلق
إخواته قالوا لي:
"الـلـي حصل حصل، ودلوقتي مين هـ يخلي باله من العيال لو اتطلقتي؟
اقفي على رجليكي، وربيهم"

هو فضل ماشي في نفس الطريق بتاعه لما دمر نفسه، وصحته اتدهورت
وجاله خسسان، وسخونة باستمرار
وكنا بـ نروح الحميات، بس هو ما كانش عاوز يقول عنده إيه
قال عاوز يموت وسره معاه
ما كانوش بـ يعرفوا عنده إيه
اتحجز تبع الشغل بتاعه في مستشفي جمال عبد الناصر، 3 شهور
لما كان عنده سرطان في الغدد اللمفاوية، وأخد علاج كيماوي
بعد كده عرفت إن الكيماوي كان غلط جدًا عليه
ومات من حوالي 3 سنين.

كنت بـ روح الحميات كل شهرين، يعملوا لنا تحليل دم
(ما أعرفش تحليل إيه)
مرة عملوا لي تحليل سي دي في 4 يوليو 2004
وقالوا هـ يعملوه كل 6 شهور، بس ما عملوش تاني
قابلت أحمد في الحميات، لقاني لابسة أسود لما جوزي مات
هو الـلـي قال لي على كاريتاس
حالتنا اتحسنت نفسيًا لما روحت كاريتاس، وعرفت المجموعة
حسيت إني مش لوحدي، بـ نقعد مع بعض، والـلـي عنده مشكلة يقولها.

نفسنا نلاقي أطباء نروح لهم من غير ما نقول عندنا "إتش آي في"
أنا عالجت سناني من غير ما أقول
ومرة روحت مع واحدة زميلتي عند د. أمراض نساء
كشف عليها، بس بعد الكشف شال كل الملايات، وشال كل حاجة.

بـ نخاف نقول للدكاترة يرفضوا يعالجونا، وإحنا مش عارفين نقول ولا لأ؟
حتى الدكتور بتاعنا بـ يقول لنا ما تقولوش إنكم مصابين
بس احنا بـ نكون خايفين نـتعالج غلط لو ما قلناش
زميلنا جمال كان عنده سرطان كابوسي، في الحميات أدوه كوبالت
وقالوا إن الكيماوي غلط
أنا جوزي أخد كيماوي، لأنه ما قالش
محمد زميلنا عنده ناصور، ومحتاج علاج
وخايف يروح يتعالج، لأن جسمه مليان السرطان
والدكاترة هـ تعرف حتى لو ما قالش.

عملوا في الحميات قسم نضيف جدًا اسمه "المناعة الخاصة"
كان من 3 سنين وحش جدًا، لما كنت بروح مع جوزي
دلوقتي جابوا جهاز سي دي 4، لكن لسه ماعملناش تحليل
د. هشام بـ يقول لازم بتوع مصر يقولوا له الأول
كلمنا د. إيهاب، قال هـ نقول لكم تروحوا خمسة خمسة تحللوا
لكن لسه ما قالوش امتى.

مفيش حد بـ يتابعنا
واحد زميلنا اسمه محمد، قابلناه بالصدفة في الحميات
كان تعبان خالص، واحنا الـلـي أخدناه مصر عشان ياخد العلاج
دلوقتي اتحسن جدًا بعد العلاج، ورجع الشغل
لو كان فضل من غير علاج كده، كان زمانه مات
العلاج لازم من الوزارة، بس بـ يقولوا هـ يتوفر في الحميات لبتوع الاسكندرية، والمحلة، والبحيرة.

أنا قولت لأهلي وولاد خالتي كلهم عارفين، وبـ كلمهم عادي
واحدة بس من بنات خالي كشت مني شوية بعد ما عرفت
في الأول كنت بـ روح لها وآكل عندها، دلوقتي طَلَبت إني ما روحلهاش
وساعات بـ ترسل لي مساعدة عن طريق ثالث
وجيراني ما يعرفوش
مرة واحدة جارتي دخلت عندي لاقت كتاب عن الإيدز على السرير
خافت، واتخضت، وقالت: "إيه ده؟"
قلت لها إنه كتاب للشغل بتاعي،
لو الجيران عرفوا حاجة زي دي هـ يخافوا مني،
واتقدم لي واحد من العمارة عشان يتجوزني، ورفضت
لأني خايفة أقول له عن حالتي، يروح يقول للجيران
ومش ممكن أتجوزه من غير ما أقول له.

الإعلانات عن الايدز بـ تخوف
كنت عارفة إنه بـ يتنقل عن طريق الدم والجنس بس
إحنا نِفسنا في حاجة إعلامية تغير الفكرة شوية
مثلًا فيلم "الحب في طابا" كان بـ يدي صورة وحشة جدًا.

أهم مشاكل العلاج، هي أقول ولا لأ لو عاوزة أروح للدكتور؟
يا ريت فيه دكاترة أروح ليها من غير إحراج
أنا عاوزة أتعالج صح، ومش عاوزة أؤذي حد
ونفسنا في مشاريع صغيرة، أو توظيف للناس، يفتح لهم باب رزق.

x
تنويه القصص الموجودة على هذا الموقع قد تسبب للبعض شعور بعدم الارتياح أو الألم. في حالة شعورك بذلك، تذكر أن تتنفس، وأن تأخذ بعض الوقت مع ذاتك قبل مواصلة القراءة، أو بالتوقف عن القراءة إذا استدعى الأمر