هـ لحق أجري؟

هـ لحق أجري؟

لاقيت نفسي بـ تزق في الحيطة، وزق زق لحد ما لاقيت نفسي جوا محل هدوم في شارع طلعت حرب
وقتها الضرب كان عشوائي لكن عنيف جداً
وكان فيه صوت ضرب نار.

كنت مع حوالي 10 بنات في مساحة صغيرة بين باب المحل الإزاز والباب الحديد الخارجي
مساحة تكفي شخص أو بالكتير اتنين
ضلمة ومفيش هوا
كنا بـ نزق عشان ندخل لكن البنات الـلـي شغالين في المحل زقوا الباب لحد ما قفلوه
وصاحب المحل شد الباب الحديد التاني وهو واقف برا وقفله
ما فرقـش معاه نموت، المهم المحل ما يـتـكـسـرش.

وجنبي بنات بـ تـتـشـنِّـج وتـصوَّت
قعدنا كتير نـصرخ عشان يـدخلونا المحل أو يطلعونا
لكن صاحب المحل كان بـ يزعق ويقول لـلـي شغالين جوا:
"إوعي تفتحي الباب يا بت"

كل ده وانا سامعة المتحرشين برا بـ يزعقوا
"اطلعوا نعمل عليكم حفلة"
وصوت خبطهم على حديد الباب عشان يـخرجونا
كل تفكيري وقتها كان إن الإزاز ما يـتـكـسـرش عليا
مع إني قبل ما أدخل شفت بنتين على الأرض
ورجالة فوقهم بـ يـقـلَّـعـوهم لبسهم.
"محدش يزقـنـي"
ما كـنـتـش بـ فكر في الـلـي ممكن يحصل لي لو طلعت برا، هـ يـمـسـكوني؟
هـ يـقـلَّـعـوني؟
أنا بس كنت عايزة أتنفِّس
بس ما كـنـتـش عارفة هل لما أطلع برا هـ لحق أجري منهم؟

x
تنويه القصص الموجودة على هذا الموقع قد تسبب للبعض شعور بعدم الارتياح أو الألم. في حالة شعورك بذلك، تذكر أن تتنفس، وأن تأخذ بعض الوقت مع ذاتك قبل مواصلة القراءة، أو بالتوقف عن القراءة إذا استدعى الأمر