خصوصيتي

ما ينفعش أبدًا حد يفرض نفسه على حد ويخترق خصوصيته زي ما انت بـ تعمل معايا كده
أنت يوم كلمتني لاقيت موبايلي مقفول، فيها إيــــه؟
إيه المشكلة يعني؟
هو ما ينفعش حد يكون موبايله مقفول ولا إيه
المهم... كلمتني لاقيت موبايلي مقفول، يبقى خلاص ما فيهاش حاجة
ومش المفروض تعمل كل اللي حصل ده!

أنا رجعت من شغلي الساعة 6
نمت، والموبايل فصل شحن وانا نايمة
فـفضل مقفول لحد ما صحيت الساعة 12 وشحنته وفتحته....
ليه بقى أفتح الموبايل ألاقي رسالة بـ تقول:
"أنا قلقان عليكي... أرجوكي طمنيني عليكي لما تفتحي الموبايل"
الكلام ده بـ تقوله على أساس إيه يعني
تعرف إيه عن حياتي ومواعيدي
وبـ عمل إيه، وبـ نام إمتى، وبـ صحى إمتى
وموبايلي مقفول ولا مفتوح
وفجأة كده عشان موبايلي مقفول تقلق عليا وتعمل حدوتة من مفيش
بصفتك إيه بـ تقول لي طمنيني والكلام ده
بتاع إيه يعني، وأطمنك على إيه أساسًا
هو أنا كنت قايلة لك داخلة أعمل عملية، ولا طالعة على طريق سريع
فـقلقان عليا وعايزني أطمنك عليا
ده اسمه وهم، وأي كلام

المهم أول ما فتحت الموبايل، طبعا انت جالك تقرير إن أنا جت لي الرسالة
فـعرفت إني فتحت الموبايل
ورنيت رنة عشان تتأكد إن الموبايل اتفتح
وبعدين اتكلمت الساعة 12
أصلًا مش المفروض تسمح لنفسك تكلمني في وقت متأخر
وتتعدى حدودك معايا، وتدي لنفسك حق مش حقك، وتخترق خصوصيتي
ولما أنت كلمتني، أنا ما رديتش
وبعدين دقيقة وبعت رسالة تاني تقول "أنا لسه قلقان عليكي"
برضه قلقان على إيه ومن إيه وليه؟
وبعد الرسالة اتكلمت تاني، وقفلت عليك، فأنت مش خلاص كفاية
لا ده انت بعت رسالة تاني وتقول فيها "فعلًا مش فاهم انتِ ليه بتعملي كده؟"
إيـــــه ده؟ إيــــــــــه اللي أنا بـ عمله؟!
إيه كل الرسايل دي، وبـ تتكلم في وقت متأخر وقفلت عليك، و برضه مصمم تتكلم
وفارض نفسك عليا في نص الليل.
وبعدين الصبح بدري أصحى على التليفون بـ يرن بدري،
وتطلع انت برضه، ومش مرة لا دي مرة واتنين وتلاتة
ما ينفعش أبدًا قلة ذوق كده الصبح بدري وبالليل متأخر.

مش المفروض خالص أصحى الساعة 12
وأول حاجة أعملها أرد عليك
ومش المفروض أصحى الصبح
أول حاجة أعملها برضه إني أرد عليك
يعني مش من حقك تتعدي حدودك كده خالص

انت بـ تعمل كده على أساس إيه؟ بصفتك إيه؟ وقلقان على ايه؟
وقلة الذوق تكمل بأنك تسمح لنفسك تكلم واحد فى الشغل تسأله عليّ
إزاي تسمح لنفسك تعمل حاجة زي كده؟ إزاي؟
عيب جدًا، عيــــب
هو مين أصلاً عشان تسأله عليا؟ ده مجرد زميل معايا في الشغل
كمان تسأله عليا بصفتك مين؟ خطيبي؟ أخويا؟ أبويا؟
ده أهلي ما يعملوش كده!

x
تنويه القصص الموجودة على هذا الموقع قد تسبب للبعض شعور بعدم الارتياح أو الألم. في حالة شعورك بذلك، تذكر أن تتنفس، وأن تأخذ بعض الوقت مع ذاتك قبل مواصلة القراءة، أو بالتوقف عن القراءة إذا استدعى الأمر