مش عارفة ليه مش عارفة أنسى الراجل ده؟
كان أبو واحدة صاحبتي في ثانوي،
الحقيقة هي كانت كمان جارتي.
في يوم اتصلت بيها، وطلبت منها نخرج نروح المول
علشان نجيب شوية لبس، وحاجات ليا.
قالت لي: "أوكيه، بس لازم استأذن بابا
لأنه أجازة النهارده، ومش هـ عرف أزوغ منه".
قالت لي: "كلميه أنتِ علشان يقتنع"
قولت: "ماشي، عملتها كتير"
إنما حقيقي بقى، أبو صاحبتي ده كان استثناء
أولًا: خد كل بياناتي
ولولا إني كنت تحت السن القانوني، كان أخد رقم بطاقتي
بعدها بقى قعد يسألني بابا مين؟ وأخواتي مين؟
وأسئلة كده من الـلـي بتوع التعداد السكاني بـ يسألوها.
وبعد ما خلص كلام، قولت له على موضوع الخروجة
تفتكروا قال لي إيه؟
"طيب، ممكن أطلب منك طلب؟"
"أكيد يا أونكل
"ممكن أمشي وراكوا؟"
"نعم؟"
كنت عايزة أقوله، يعني لو حضرتك فتحت دولاب بنتك
هـ تلاقي فستاني القصير الـلـي أنا بـ لبسه في البيت أصلًا
وعلى فكرة، هي سالفاه بقاله شهر وما جابتوش
وعلى فكرة، بنتك امبارح شيلتني شنطتها
وما راحتش المدرسة، وخرجت مع صاحبها.
عمو، أنت تعرف إن لما بنتك بـ تقعد قدام الكتاب
تذاكر يا عيني، بـ تبقى حاطة رواية من روايات عبير في نُص الكتاب؟
تعرف إن أي حاجة أنت بـ تؤمرها بيها، بـ تعمل بالظبط عكسها؟
عمو حضرتك تعرف بنتك أساسًا؟
طبعًا كل الكلام ده كان حوار في خيالي أنا
وبدل منه قولت له:
"أونكل أنا آسفة أوي
أنا نسيت إن عندي ميعاد مع دكتور الأسنان".