أختي مرة دخلت عليا
وادتني كارت عليه صورة ورد بمبي، ولؤلؤ، وفي ضهرها كلام
وقالت لي إن واحدة صاحبتها هى الـلـي عاملاهم
وبـ توزعهم مجانًا.
أنا قريت الكلام ده من هنا
وحسيت إني عايزة أولع في أختي وصاحبتها من هنا.
الكلام الـلـي في ظهر الورقة بـ يحكي قصة الوردة واللؤلؤة
الوردة بـ تشتكي لللؤلؤة من إنها حاسة إن الناس بـ تعاملها وحش
واللؤلؤة بـ تكلمها عن إزاى هي حاسة بالأمان وهي مدفونة في قاع البحر.
اللؤلؤة عايشة في صدفة مقفول عليها، بعيد عن الناس
وبالتالي ده -من وجهة نظر اللؤلؤة- بـ يخليها أغلى، وأقيم.
وفي الآخر الكاتب العظيم بـ يقول:
"إن الوردة بـ ترمز للبنت الـلـي مش محجبة
الـلـي بـ تبين مفاتنها،
واللؤلؤة بـ ترمز للبنت المحجبة، الـلـي بـ تدارى مفاتنها".
بس كده؟ هو ده الحجاب في نظركم؟
يعنى بعد كل الحركات النسائية الثورية
والكلام عن إن الست تقدر تثبت نفسها في أماكن أخرى غير أوضة النوم
تيجي حتة ورقة تقول لك: "دارى مفاتنك، لأن هو ده كل الـلـي عندك"
أنا مش لؤلؤة، أنا مش لؤلؤة
أنا بني آدمة.