علشان أبقى راجل

علشان أبقى راجل

أنا بحب أتعامل بطبيعتى، ما بــعرفش أبقى مصطنع.
بحاول أتكلم بالطريقة اللى تريحنى،
وبحاول أقعد بالطريقة اللى تريحنى …
أنا من الناس اللى ساعات بتعبر عن كلامها بحركات بالإيد،
ودايما بسمع التعليق ده
"مفيش راجل بـ يتكلم بإيده"
وساعات كمان بسمع "مفيش راجل بـ يقعد القعدة دى"
الموضوع بقى بيتطور وبسمع كلام زى "استرجل"، و"خليك راجل"، و"انت مش مرة"، و"بلاش شغل النسوان ده"،
و"مفيش راجل بـ يعيط بالشكل ده"، و"دى حركات نسوان"،
و"الستات بس هم اللى بيقعدوا كده" ...
الموضوع سخيف وبـ يضايق. والتعليقات دى مش بـ تتقال من ولاد بس، لأ ولاد وبنات!
مع إنى مش عارف إيه الشتيمة لما تقول لواحد "انت ست"، وكأن الست دى شتيمة أو مسبة.
وبقت بتوصل بناس البجاحة إنهم يقولولى "انت منسون" أو "دلوع" أو "خول"! وانا برضه ما أعرفش هم بيقولولى كده ليه.
الكلام ده ساعات بــ يـتقالى من أقرب الناس ليا وبــ يوجعنى بس بحاول أعمل مش فارق معايا ...
لازم أقعد بطريقة معينة. ما ينفعش أتكلم بإيدي. ما ينفعش أعيط وانا مع ناس. واللى يضربنى أضربه ... دى من الأمثلة اللى اتقالتلى علشان "أبقى راجل".
أنا هفضل أحاول أتعامل بطبيعتى وهـ فضل أحاول أبقى نفسى، مهما الموضوع كلفنى، ومهما اتقال عنى "انت مش راجل".

x
تنويه القصص الموجودة على هذا الموقع قد تسبب للبعض شعور بعدم الارتياح أو الألم. في حالة شعورك بذلك، تذكر أن تتنفس، وأن تأخذ بعض الوقت مع ذاتك قبل مواصلة القراءة، أو بالتوقف عن القراءة إذا استدعى الأمر