أنا عاوزة أكون مع راجل وأحس إنه أشجع مني .
مش لاقية رجالة شجاعة، خصوصا بعد الثورة ...
يعني يشوف الخطر، ما يخافش
بس خايفة كده أكون بـ ظلمه.
أنا مش محتاجة راجل يحميني لأني خايفة؛
أنا عاوزة راجل شريك ليّا.
الشجاعة لازم تكون أدبية من غير غيرة ونفسنة،
ومش عاوزاه يتضايق لما أكون أحسن منه أو ناجحة،
يعني يبقى قلبه عليا.
وشجاع برضه يعني ييجي يصارحني بمشاعره من غير كسوف ولا قلق
ويكون كده واثق من نفسه.
أنا نفسي الرجل اللي يعمل الحاجات دي تكون من حب حقيقي مش سيطرة وتحكم.
يحميني لأنه بيحبني مش علشان أنا جبانة أو ضعيفة.
نفسي في كده أوي.
هو النوع ده من الولاد موجود بس قليل مش الأغلبية.
الأغلبية بتقلق لما تشوف البنت ناجحة أكتر.
هو بيبقى عاوز الدور المعيَّن ليها اللي ما تكبرش عنه
ويكون هو المسئول والحامي ليها.
أنا كنت فاكرة قبل الثورة إن الولاد في الجيل ده تافهين
وما كنتش حاسة إن فيه ولاد أو بنات ليهم أي اهتمام أو عمل عام…
كان فيه فراغ.
لكن الثورة فاجئتني إن الولاد اللي شكلهم هايف طلعوا رجالة
وواجهوا الخطر كل يوم في الميادين واللجان الشعبية.
علشان كده أنا متفائلة.