أنا لسه قالعة الحجاب من كام شهر كده
خايفة جدًا رمضان يـ يجي
بسبب الـلـي ممكن أهلي يقولوه، أو الناس في الشارع في رمضان.
وانا محجبة، كنت بـ تعرض لتعليقات سخيفة جدًا من أهلي، أو الناس في الشارع
لما كنت بـ حط روج مثلًا، أو يبان عليا النشاط شوية
كان في كذا مرة سواق يقول لي: "هو أنتِ مش صايمة يا آنسة ولا إيه؟"
واتخانق معاه، ولما يشوف إن فيا حيل أتخانق معاه، واشتمه،
يقول لي: "يبقى أنتِ أكيد مش صايمة".
وانا في المدرسة، كان زمايلي الولاد يقعدوا يراقبوا البنات
ويشوفوا مين بـ تدخل الحمام، وتشرب، أو تاكل،
أو يبان عليها كده، ويقعدوا يقولوا إنها مش صايمة، وعندها البيريود
ويبقوا مبسوطين أوي باكشافهم العظيم ده.
أنا كنت بـ تكسف أقول إني فاطرة قدام أي حد وانا عندي البيريود
وأوقات كنت بـ صوم في الوقت ده، واتعب جدًا،
علشان ما يبانش عليا إني فاطرة،
أو علشان مش بـ عرف آكل أصلًا قدام حد لو كنت برا البيت.
الناس في رمضان بـ يقعدوا يراقبوا البنات في كل حاجة
على أساس إنها هـ تدمر الكون، وتوقف الزمن،
وتـ بوظ لهم صيامهم وإيمانهم.