عمر ما حد قال لي ما تعيطش
بس لسبب ما، أنا كنت عارف إنها مهينة
يعني لو أنت عيطت، ما تبقاش راجل.

وانا صغير ما كنتش بحب أعيط قصاد حد خالص
والموضوع ده كمل معايا لغاية دلوقتي
بعيط آه، بس لوحدي، وما بحبش حد يشوف ده.

كنت أشقى واحد في أخواتي
واتعورت كتير، واتجبست كتير
فكان دايمًا بـ يتقال لي "يا شقي"
و"عمرك ما هـ تبقى حاجة"
و ده للأسف الـلـي دخلنى صيدلة
لأني برضه مشيت وراهم.

حاجة مجموعها عالي، وانا كنت حالف ما داخل طب
ما بحبش الدراسة، ولا المذاكرة خالص
"أنت مش زي اخواتك"، دي اتقالت لي كتير أوي
أخواتي كانوا شاطرين، وانا بقى مفروض أمشى وراهم
ما كنتش عايز أبقى زيهم خالص.

بس كان بـ يتقال لي:
"ما ينفعش، أنت بـ تروح لنفس المدرسين الـلـي بـ يروحوا عندهم"
"لازم تبقى شاطر زيهم"
فضلت أسمع "أنت فاشل"
و"أنت لو دخلت كلية يبقى علشان خاطر أمك وأبوك
مش علشان خاطر نفسك".

كانوا شايفين إني هـ دخل حاجة خاصة
لأني أكيد هـ كون خارج التنسيق والكلام ده
لسبب ما، أنا كنت شاطر، بس ما كنتش بـ ذاكر
جبت أعلى منهم كلهم
نجحت في التحدي
بس هو كان تحدي الناس حـطـتـهولي
لكن الموضوع ما فرقش معايا أنا بأي حاجة.

بعد ما نجحت ودخلت كلية صيدلية، الموضوع اختلف
والناس ابتدت تبص لي بصة احترام، مش عارف ليه
وأنا آسف في اللفظ، بس الكلمة الوسخة الـلـي بـ تتقال "يا دكتور"
كلمة مؤذية
لأنك بـ تبدأ تتصنف إنك ما ينفعش علشان منظرك وشكلك تعمل كذا
"كراجل دكتور، إزاى تعمل الـلـي أنت بـ تعمله ده؟"
على أي حاجة هم شايفينها غلط.

"ما ينفعش تـتضايق، وتقول ألفاظ زي دي"
"ما ينفعش تشرب مخدرات"
"ما ينفعش تشرب خمرة"
مش عارف إيه علاقة الدكاترة بالموضوع.

حاجة تانية صعبة جدًا، ومفزعة جدًا
يعني إيه لمجرد إني بقيت دكتور
لازم ارتبط واتجوز بدكتورة
إيه الفكرة يعني؟
هو إيه الحب والراحة النفسية الـلـي بـ تتقاس بمجموع الثانوية العامة ده؟
إيه الخرا ده!
الكلمة بقت عاملة زى الـلـي مريض بحاجة
و مش هـ يشفى منها، و لازم يرتب حياته على أساسها.

الكلمة دي بقت هي الأساس، مش حياتي وشخصيتي هي الأساس الـلـي بـ بني عليه،
أنا مش عريس لقطة
و لا أنا إنسان كويس
و لا أنا حد محترم ابن ناس علشاني أنا،
الكلمه دية هي الـلـي كفلت لي كل ده.

أنا أكتر بنت حبيتها، ولسه بحبها
لسه ما خدتش ثانوية عامة
أتمنى إني كنت أبقى معاها في المدرسة علشان أعرف أبقى جنبها،
علشان نبقى مناسبين لبعض من وجهة نظر صحابنا وأهلنا.

مش متخيلين مدى الرفض الـلـي قابلني لما صحابي عرفوا الموضوع ده
أنا عايز آخد خطوة فيه
عيلتى لسه ما تعرفش
بس حتى لو عرفوا، وقدرت أقف قصادهم
هى بـ يتقال لها كلام زى الزفت
ومقدر جدًا كم الكلام الـلـي يتقال لها بسبب الموضوع ده،
هي Already بـ تسمعه، وهـ تسمعه كتير.

أنا مرة اتقال لي دول يحمدوا ربنا
ويبوسوا إيدهم وش وضهر
إن أنت موافق بيها
لأ، يحمدوا ربنا على ايه؟
ما يمكن أنا شخصية وسخة
إيه الـلـي فيا يعني؟ ما أنا منيل بنيلة
يحمدوا ربنا إيه؟
أنا الـلـي محتاج أحمده
أنا الـلـي محتاج لها،
ومحتاج لها أوي كمان
أنا بحبها.