أنا اتجوزت بعد قصة حب استمرت 6 سنين،
طول فترة الحب دي كنت عارفة إنه بـ يخوني مع الشغالة الـلـي قاعدة معاهم في البيت وبـ تخدم أمه.
واجهته في الأول وأنكر، وبعد كده اعترف لي، وحلف أنه هـ ينهـيها،
بس مش هـ يقدر يمشيها غير لما نتجوز؛ علشان شايلة أمه وبـ تخدمها.
اعترف لي إنها كانت بـ تشتغل في الأعمال المنافية للآداب.

ابتدينا نجهز لجوازنا، وطلب مني إني أعيش مع والدته؛ عشان مالهاش غيره، ووافقت.
في فترة الجهاز بقيت بـ شوف تجاوزات بينه وبين الخدامة،
ويحصل مشاكل، ويرجع يعتذر، ونتصالح.

اتجوزنا، وبعد جوازنا بأيام ابتدت المشاكل،
هو وأمه رفضوا إن الشغالة تمشي، اتقالي هي ست البيت.
جوزي رفض ياكل من إيدي، وما بـ ياكلـش غير من إيديها.
ابتدت تـتحكم فيا أنا كمان….
تدخل علينا في أوضة النوم في أي وقت، ولو اعترضت اتضرب.

اشتكيت لأهله، قالولي:
"معلش استحملي، وأول ما تحملي ويشوف ابنه هـ يعقل".
طبعًا ده ما حصلش، ووصل الموضوع إني أشوفهم في علاقة….
لما اشتكيت لحماتي، قالتلي:
"هو بـ يحبها، واتجوزك بس عشان واجهة اجتماعية".
كنت حامل، وما عداش على جوازي شهور،
ولما قولت لأهلي إني عايزة اتطلق، رفضوا.

ابتدت المشاكل تكتر، والشتايم، والإهانة تكتر،
وما بقاش عندي أي خصوصية حتى في أوضة نومي….
في يوم مسكني، وضربني هو والشغالة، وحاولوا يسقطوني،
كلمت أهلي، وأخدوني نقلوني المستشفى، ورجعت بيت أهلي،
الدكتور طلب مني الراحة؛ علشان الجنين يثبت.

اتفاجئت إن جوزي بعتلي هدومي في أكياس زبالة على بيت أهلي،
واستولوا على كل منقولاتي، وذهبي.
رفض يقعد مع أي حد من أهلي عشان نطلق،
لما وصلنا المحاكم، وافق على الطلاق، بس على شرط….
أعفيه من كل مستحقاتي، وحقوقي، وأسقط الجنين.

بعد مفاوضات طلقني على الإبراء، وأخد كل حاجة،
في مقابل احتفظ بالجنين على شرط إني ما أطلبش حتى نفقة الطفل، وإلا هـ يخطفه.