أنا بقالي أسبوع في قرف.
جوزي كلمني وقالي أنا عايزك ترجعي بس بشروطي،
قلتله: "شروط إيه فاكر لما كنت بـ تبوس رجلي زمان عشان أرضي؟"
قالي: "انت أصلا اللي كنت بـ تبوسي رجلي أنا أصلا مش عايزك،
أنا بس كنت عايز أعرف انت في دماغك إيه"
أنا مش ندمانة إني سبته،
بس لما ابتدي يكلمني اتمنيت إنه يكون اتعدل عشان أرجعله،
لأن أي واحدة بـ تتمني تربي عيالها مع جوزها.
أنا عارفة إنه عايز يرجعني عشان أمضي تنازل علي القايمة،
أعمل كده ليه أنا أصلا رافعة عليه قضيه خلع.
ابن خالة جوزي بـ يكلمني وبـ يقولي نرجع،
قولت له لأ مش هـ رجعله تاني، قالي: "عشان البنات".
قولت له: "لما العيال يتربوا بين زوج وزوجة مطلقين بس بـ يحترموا بعض،
أحسن ما يعيشوا مع اتنين بـ يكرهوا بعض".
قالي: "طب القايمة؟"
قولتله: "هو انتوا ليه بـ تتكلموا علي القايمة، ومحدش بـ يتكلم علي مصاريف العيال؟
العيال دول إيه بـ ياكلوا طوب وزلط؟ بـ يلبسوا خيش؟
بقاله 10 شهور ما بـ يصرفش عـالعيال"
قالي: "هو مش ممانع"
"طب مستني إيه عشان يصرف عليهم؟؟"
ساعات بـ قعد أفكر،
لما البنات تكبر مين هـ يقف لهم في جوازهم ومين هـ يجهزهم
بس لما بـ فتكر اللي هو عمله بـ قول أرجع لمين!
ده أنا كنت بسمعه بودني بـ يكلم واحدة ويقولها أجيبلك شقة تلات أوض مش أوضتين،
وكان بـ يقولها هـ تجوزك.
كان بـ يعاملني معاملة كلها ذل، ولما طفشت ومشيت عايزني دلوقتي أرجع.
أنا لو عرفت إنه اتجوز هـ حبسه بالقايمة، ودي هـ تبقي هدية جوازه.
بدأت المشاكل من سنة …
عارفة لما واحد يستفزك بكل الطرق علي أساس يزهقك؟
كلام، شتايم، ضرب، حتي العلاقة اللي كانت بيني وبينه ...
مش عارفة أقول إيه،
تحسي إنه زي ما يكون واحد بـ يغتصب واحدة مش واحد نايم مع مراته.
كان السيم بتاعه لما يعوزني ينادي علي البت الصغيرة يقولها:
"خلي أمك تعمل فنجان قهوة وتجيلي"
كنت أبقي داخلة بـ قول يا رب يا رب الأوضة تولع بيا أنا وهو،
بعد ما يخلص ضرب بالأقلام وشد من شعري،
ويروح تافف علي وشي ويقولي: "انت بالنسبة لي حمام
أنا بعمل كده عشان مزاجي انا مش مزاجك"
ولو ماجاش يتف في وشي تاني،
وكان ياخد الفوط ينشف فيها ويرميها في وشي.
لما كنت أخش أستحمي بعدها كان يقولي يالا يا نجسة روحي نزلي النجاسة.
لقيت المعاملة بقت كل يوم للأسوأ، قلت خلاص بقي ما بدهاش
آخر مرة ضربنى لما رحت أقابل ابني عشان هو كان مطفشة مالبيت.
جه مالشغل وقلع وراح فاكك الحزام وحطه عالسرير،
نادي عالبت الصغيرة وقالها هاتي أمك وأختك، وتعاليلي.
البت كانت في الأوضة، وانا والبت التانية علي باب الأوضة.
قالها: "قولوا لي كده شوفتوا أخوكم كام مرة من غير كدب"
البت خافت وقالت له ما شوفناهوش،
أنا قولتله" "ده ابني وانا أشوفه في أي وقت، مش كفاية انت حارمني منه"
قالي: "الكلام ده عند أمك ولما جه اديتيله إيه؟"
قولتله: "لعلمك ابنك مش محتاج مني ولا منك حاجة،
ابنك بـ يشتغل ويصرف علي نفسه، ابنك راجل"
هو سمع الكلمة دي وزي ما يكون نار قادت فيه،
شدني وقعني عالأرض وضرب بالأقلام، وقعت اغم عليا.
ما دريتش بنفسي غير وانا بقوله يا ابن ميتين الكلب ربنا يـنـتـقملي منك.
وخدت البت وخرجت مالأوضة وهو قعد يشتم
زي ما أكون كنت واحدة مش في وعيها سامعاه وهو عمال يشتم
ويقول اأا عملتك ست ولميتك في بيت،
والله لاخليكي تمشي من هنا وانت حالقة شعرك.
وانا كل اللي بـ عمله قاعدة بعيط،
بعد كده بقي ينادي عـالبت الصغيرة لما يعوز منى حاجة
ويقولها: "قوليلها بابا بـ يقولك يا شرموطه قومي اعملي كذا
واسمعك وانت بتقولى لها!"
البت كانت تجيلي وهي عينها مرغرغة بالدموع،
أقولها قولي ما تخافيش ده مش انت اللي بـ تقولي ده هو.
ودي بقي كانت النهاية،
كلمت ابنى وقولتله تعالي خدني أنا خلاص هـ مشي،
ما كـنـتـش متخيلة إني ممكن أسيبه.
أنا فى مشاكل من ساعة ما سبته …
دايخة بقالي شهر عشان أعمل ولاية تعليمية،
عشان ما ينفعش أنقل العيال من المدارس غير لما أرجعله.
لفوفوني من الدور الأرضي للدور التامن بتاع 3 مرات،
وفي الآخر قولت لهم انتوا بـ تلـقـفوني لبعض؟! راح عاملهالي في الدور الأرضي.
وبعدين طلعت المحكمة الدور التامن دفعت الرسوم 3.50 جنيه،
وبعد ما خلصت رحت للموظفة اللي هـ تختم الورق لاقيتها غايبة،
فقالوا لي هـ روح تاني يوم أختم الورق،
وبعدين أطلع علي محكمة زينهم بالورق.
تحس إنهم بـ يماطلوا في حاجات مش مفروض يماطلوا فيها،
يعني هو ممكن يسحب ملفات العيال مالمدرسة عشان يساومني عالقايمة.
والعيال كده كده معايا فانا لازم أعمل الولاية التعليمية دي عشان أحافظ علي مستقبلهم.
والمحامي يقولي العيال الكبار البت والولد يروحوا يقدموا علي النفقة لوحدهم عشان 15 و 16 سنة،
وانا مش عايزاهم يخشوا محاكم والكلام ده.
وبعدين رجع قالي العيال يعملوا لك توكيل، فانا مش عارفة.
يعني أصلا العيال التلاتة معايا، وأبوهم مش عايز يصرف عليهم،
يبقي الطبيعي إن أنا اللي أرفعلهم قضية،
مرمطة وفلوس …
أنا دافعة في قضية الخلع 2000 جنيه للمحامي، والاسم عاملها لي خدمة!
ولسه كام قضية تانيين عشان العيال، فانا مش عارفة أعمل إيه.