أنا سلبية، وضعيفة، وجاهلة
متغطية من فوقي لتحتي
ضُرَّة على تلاتة تانيين
بـ شتغل في المطبخ طول النهار
وبـ فتح رجلي طول الليل
ده اللي انتم متصورينه عني، مش كده؟
غريب أوي إزاي شيطان الجهل يقدر ينشر الكم ده من الجهل
وسط ناس المفروض إنهم "متحضرين"
المستشرقين بخوا آراؤهم في عقول ناس كتير
بالنسبة لهم، أنا واحدة من حريم السلطان
شعري أسود، لوني خمري،
عيني بـ تلمع، أجدع واحدة بـ ترقص
بس ثواني صحيح
مفيش حاجة مثيرة أو جذابة في الاستغلال الجنسي
اللي "المفروض" إننا بـ نتعرض ليه
أو
أنا فقيرة، ورجلي مشققة من كتر لبس الجزم الرخيصة
قذرة، وجعانة، وبردانة، ووحيدة
محتاجة أي مساعدة
أمريكا، انقذيني من أبويا، ومن أخويا
من ثقافتي المتخلفة
انقذيني من نفسي
خليني أقولكم حاجة
مش لازم عشان تعرفوا تقروا قصتي تكونوا ستات
بس لازم تكونوا ستات عشان تفهموها
لازم يكون الدم اللي بـ يجري في عروقي
زي الدم اللي بـ يجري في عروقكم بالظبط
قصتي بـ تحكي عن المعاناة اللي بـ مر بيها
قصتي هي دليل الإيمان اللي شايلاه جوايا
أنا ست مسلمة
محيت قوة أنبيا
حاربت جنب جوزي
ورجعت البيت بعد الحرب عشان آخد بالي من عيالي
متفاجئين؟
شايفين إني محتاجة أتحرر
بـ تقولوا عليا إيه صحيح؟
آه.. تعزيز حقوق المرأة في الشرق الأوسط
أنا عايزة أقول حاجة واحدة بس
عمر ما حريتي هـ ترجع لي من اللي قمعوني أصلًا
بـ تحاولوا تخلوني أعيش حياة ديمقراطية
وفاكرين إن حد زي كوندليزا رايس
هو اللي هـ يشرح لي إزاي أكون ست حرة
عمومًا أنا مش هنا عشان ألوم حد على حاجة
خلينا بقى ندخل في الجد أكتر
أنا مش بس بـ تحمل كمية الكره ده منكم
أنا كمان بـ تحمله من المتعصبين المقفلين جوا المجتمع بتاعي نفسه
صحيح إن أبويا المسلم بـ يقول لي ألبس إيه وما ألبسش إيه
لكن شركات الأزياء كمان بـ تعمل نفس الحاجة
طول الوقت بـ واجه المفارقة دي
خصوصًا لما بـ اخد بالي إني لو عملت اللي أنا عايزاه
محدش هـ يكون مبسوط
أنا أطيب من إني أبقى شريرة، وأشر من إني أبقى طيبة
بس ليه الازدواجية دي؟
إمتى هويتي اتحولت لشيء معتمد بالشكل ده على آراء ناس تانية؟
ليه مُصرَين تنـمـطوني؟
أو تحصروني في قوالب انتم بس اللي قادرين تفهموها؟
عملتوا كتب وأفلام بالهبل بس عشان تعرَّفني إزاي أتحرر من لبسي
بدل ما تسيبوني في حالي
إيه معنى الحرية دي لو كان إيماني نفسه متقيد بالشكل ده؟
عندكم فرنسا وتركيا مثلًا
"خلع الحجاب عن المرأة المسلمة"
ما تدوني أنا الفرصة عشان أخلع عنكم التعصب والبطريركية اللي راكباكم دي؟
افتكروا القاعدة الذهبية: عامل الأشخاص بالطريقة اللي تحب يعاملوك بيها
لو كنتم مهتمين أوي بتعليمنا ثقفوا نفسكم الأول
بدل ما كنتم بـ تحبسوا أجسامنا بس زمان، دلوقتي بقيتوا بـ تسجنوا عقولنا كمان
اضطرابات في الأكل واكتئاب، مفيش حب، ولا اهتمام كافي
الكلام عن المساواة بالشكل ده بقى مالوش قيمة، بس تمنه غالي أوي
بقيتوا تستخدموا جسمي كدعاية لكل حاجة، من السجاير للعربيات
بـ تتعاملوا مع جسمي وإيماني على إنهم نفس الشيء
بـ تشوفوا الجانب الإنساني مني ضعف
حتى لما بـ حاول أعارض شيء، أو أطالب بأي حاجة
لو عارضت الإتجار بالبشر، أو الجوع، أو الفقر، أو العنف، أو أي مشكلة "نسائية"
بـ تتجاهلوا كلامي... بـ تقولوا عليا مهووسة بالنسوية
ما تفتكروش سكوتي خضوع
وما تفتكروش إني عشان قررت أتعامل مع مشاكلي بسلمية إن قضيتي مش مقنعة
لو سألتوني إيه اللي مخليني قادرة أكمل
إجابتي مش هـ تكون الرجالة، ولا أمريكا..
إجابتي هـ تكون ربنا
أنا أمريكية من كشمير، أو مولودة في أمريكا من أصول هندية
لو حبيت أعرف نفسي، ممكن حاجة واحدة من الصفات اللي فاتت،
أو حتى ممكن أختارهم كلهم
بس في النهاية، الشيء الأساسي اللي بـ يعرفني، أني ست مسلمة