أنا مش عايزة أبقى بنت بالطريقة الـلـي الناس بـ يشوفوا بيها البنت،
أنا مش عايزة أعمل shaving،
المشكلة الناس بـ يشوفوها عفانة،
بس أنا شايفة إنه عادي
حابة أكون فلات

الجسم، الضغوط الاجتماعية

"شعرك ناعم ولا خشن؟"
على طول بـ سمع السؤال ده من كل الناس الـلـي حواليا
وعمري ما لاقـيـت الشجاعة الكافية الـلـي تخليني أرد عليهم
وأقول لهم: "آه، أنا شعري مش مفرود"
برغم إن أهلي كانوا بـ يحاولوا يقنعوني إن شعري حلو وأنا طفلة،
بس الأطفال في المدارس بصراحة كانوا بارعين في التنمر.

أنا كنت بـ كوي شعري على طول
وكنت مرتبطة، وبعدها ما حـصـلـش نصيب بينا
وبعد ما سيبنا بعض،
قررت إني أربي شعري الطبيعي وابقى حرة بطبيعتي
رجعت لـلـي كنت مرتبطة بيه زمان، وكويته مرتين عشانه
في مرة بقول له إني جاية له بشعري الطبيعي
قال لي بالنص: "نعم! جاية بيه كده ليه؟"

من وانا صغيرة بـ سمع تـلـقـيـحـات مش حلوة على شكلي وشعري،
ماما عمرها ما قالت لي إن شعري حلو

كنا في خروجة عائلية، وتقريبًا مـفـيـش حد ما قـالـش:
"إيه شعرك ده؟
يا بنتي ما تعمليه، بدل ما هو منكوش كده
ولا أنتِ عايزة تـتـعـبـي نظرنا وخلاص؟"
بكل سخرية، من غير ما يراعوا مشاعري.

أنا طول الوقت وانا صغيرة ما كـنـتـش محبوبة؛ بسبب لون بشرتي،
كان لونها الأسمر الفاتح، بس الناس دايمًا بـ تحكم بالشكل.
طول الوقت وانا في المدرسة، كانوا بـ يبصوا عليا إني مختلفة،
لدرجة إني صدقت ده.

وانا صغيرة كان شعري تقيل، وبـ كرهه من كتر ما بـ يوجعني
وما كنتش بـ عرف أسيبه خالص،
عكس أختي اللي شعرها كان حلو وناعم
وأنا عندي ١٥ سنة كده،
كنت في المصيف، ومسيباه وأنا طالعة من البحر
واحدة أجنبية وقـفـتـنـي، وسألـتـنـي: "أنتِ عاملة الكيرلي ده إزاي؟"

"منكوشة"
"تحبي أجيب لك مشط؟"
"ماله ده؟ ما بـ تـسـرحـيـهـوش ليه؟"
"متكهربة؟ معلش"
"في دكتورة شكلها كده؟"
"يا حبيبتي سرحيه، ده يلم حاجات كده"

طول عمري من وأنا صغيرة وانا شعري "وحش"،
هو فعلًا وحش، ومش كيرلي، لأ، هو خفيف من قدام، وهايش، وقصير.
وماما عملت المستحيل علشان شعري يبقى مفرود شوية أو الهيشان يقل، بس مفيش فايدة طبعًا.
ما بقاش قدامي حل غير إني ألمه كحكة على طول، على الأقل وقت المدرسة.

من التعليقات الـلـي سمعتها:
"إيه المقشة دي؟"
"يا مجنونة"
"أم شعر يقرف"
"شعرها بلح"
"أنتِ حلوة، بس لو تسرحي شعرك"