كنت محجبة وانا 11 سنة، وقلعت الحجاب
تاني يوم، روحت الشغل
حسن الـلـي في الأمن أخـدلـه ثانـيـتـيـن لحد ما عرفني
وبعدين قال لي: "صباح الخير يا أستاذة، ليه كده؟"
لكن بطيبة وعتاب فهمته واحترمته.

أنا ما كـنـتـش بكره شعري
بس كطفلة، كنت هادية جدًا، وبـ خاف من الناس
كنت بـ حاول أستخبى دايمًا من الناس والتعامل مع الناس
المهم الموضوع ده زاد جدًا بقى في المدرسة
بدأت التعليقات على شعري
"زي سلك المواعين" و"منكوشة"
وكل زمايلي كانوا بـ يـسـألـوني:"ليه شعرك كده؟"

شعري طلع ناشف جدًا وكيرلي
وماما مـا كـانـتـش عارفة تتعامل معاه، وجربت كل الكريمات والزيوت
طفولتي كلها كانت محصورة في الضفاير
شعور إن شعري مفكوك والهوا داخله ده ما حـسـيـتـهـوش
خالاتي كانوا بـ يـعـيـِّبـوا عليا، ويقولوا شعرك شبه عماتك
وعماتي كانوا بـ يـبـصوا لي بحسرة،
كأني عندي عاهة مش عارفين يـ تعاملوا معاها.

وانا صغيرة كان شعري تقيل، وبـ كرهه من كتر ما بـ يوجعني
وما كنتش بـ عرف أسيبه خالص،
عكس أختي اللي شعرها كان حلو وناعم
وأنا عندي ١٥ سنة كده،
كنت في المصيف، ومسيباه وأنا طالعة من البحر
واحدة أجنبية وقـفـتـنـي، وسألـتـنـي: "أنتِ عاملة الكيرلي ده إزاي؟"

عايزين عروسة، لازم تكون جميلة الجميلات
يعني إيه جميلة؟
يعني بيضا، وشعرها ناعم
أكـنـنـا بـ نختار جاموسة
مقاييس مش عارفة مين بالظبط حطها، وليه مشينا عليها؟

ببساطة أنا بنت، بس عمري ما بـ قعد قدام أي حد بشعري
حتى في البيت، حتى وانا نايمة، حتى وانا خارجة من الحمام
في كل وقت لابسة طرحة على شعري
عشان كمية الإساءات الـلـي بـ سمعها
ونظراتهم ليا "أنتِ شعرك خشن"

أنا كنت بـ كوي شعري على طول
وكنت مرتبطة، وبعدها ما حـصـلـش نصيب بينا
وبعد ما سيبنا بعض،
قررت إني أربي شعري الطبيعي وابقى حرة بطبيعتي
رجعت لـلـي كنت مرتبطة بيه زمان، وكويته مرتين عشانه
في مرة بقول له إني جاية له بشعري الطبيعي
قال لي بالنص: "نعم! جاية بيه كده ليه؟"

وانا صغيرة في المدرسة كانوا الأولاد والبنات بـ يـبـصوا لشعري
ويـقـعـدوا يـنـادوا، ويـضـحـكـوا: "سلكة... سلكة"
كنت معظم الوقت بـ جدّل شعري عشان ما يبـانـش الفرق عن باقي البنات، إن شعري خشن.
وبس كبرت شوية، بـقـيـت أسـشـوره دايمًا، وأعمله بكريم الفرد
وكنت بـ افكر إنه كده أنا بقيت أشـبـهـهـم، وما بـقـاش حد بـ يقول لي "سلكة"

من ساعة ما جيت مصر بدأت أشوف تريقة الناس على شعري الكيرلي
بـ سمع التريقة في الشارع زي "سرحي شعرك"
"يا كرتة"
"إيه النكشة دي"

كنت دايمًا بـ اعمل شعرى
وأول ما بطَّلت أعمله، نزلت مرة مع ناس
كنت تريقة القعدة
لما روَّحت، لاقـيـتـهـم حاطين أغنية لبوب مارلي على الجروب بتاعنا
وبـ يـتـريـقـوا عليا.