"مش حابة تـ تجوزي ليه؟"
"أصل نفسي مسدودة"
"ونفسك هـ تتفتح إمتى إن شاء الله؟"
"مش عارفة، دي حاجة من عند ربنا"
"ما ينفعش نعمل حاجة نفتحها؟"
"لأ، ممكن تدعي"
"بـ دعي، بس أنتِ كمان شدي حيلك".
جدتي كل مرة تـشوفني، تمسك صباعي ده
وتسألني نفس السؤال: "هـ تفرحي قلبي أمتى؟"
"وهو قلبك مش فرحان؟"
"لأ"
"طب أفرحه إزاي؟"
"أشوفك في بيتك مع جوزك"
"طب وقلبي أنا؟"
بعد فترة، "هاه، نفسك اتفتحت ولا لسه؟
ما عندكيش صاحب للجواز؟"
"لا عندي صاحب مش للجواز، ينفع؟"
خالتي: "هـ تفضلي تـ تنطتي كده؟
خدي بالك، التنطيط ده مش هـ ينفعك طول عمرك
بكره تـتدوري، وتلاقي كل صحابك اتجوزوا، وأنتِ قاعدة لوحدك".