الأسبوع اللي فات حصلت مشكلة مع طليقي واتهجم عليا فـالشارع
وكل ده عشان عرف إن انا وبنتي بـ نشتغل
قال: "لا ما تـشـتـغـلوش!"
ازاى ما نشتغلش وهو ما بـ يدفعش نفقة للعيال؟!
أختى الكبيرة هى اللي بـ تصرف علي البيت، وانا بـ تضايق لما بـ تعمل كده.
أنا قولت له هـ نشنغل ومالكش دعوة بينا.
سبته ومشيت انا وبنتي روحنا نجيب أكل، وبعدين عديت على أختى الكبيرة حكيتلها.
قالتلي روحي وانا جايالك،
روحت بفتح باب الشقة لاقيته جوا الشقة،
أتاريه طلع من المنور وبـ يقولي "شقتي امشي منها!"
أنا من كتر الضرب والمهاتية وقعت عالأرض وقعدت اتهته،
بنتي قالت له: "امشي وسيبنا مالكش دعوة بينا"
من غيظه بقي يضرب فيها وفيا وانا مغم عليا،
نزلني انا وبنتي وطلعنا عالمستشفي،
وما فـقـتش غير لما الدكتور حطلي سبرتو في مناخيري .
الناس اتلمت وقالوا له: "ازاي تكون شيخ وتتهجم عليها بعد ما طلقتها؟"
يقول: "دى مراتى لحد مالعدة تخلص!"
مراته! مراته مين! أنا اللي كان مسكتني كان خوفي من أخواتي الصبيان،
دلوقتي ما بـ خافش، وصوتي اللي كان واطي ما بقاش واطي
أنا ما قصرتش، وصبرت وقلت أعيش عشان خاطر العيال،
لكن أنا خلاص مش عايزاه،
ولا شرع ولا دين يخلوني أرجعله.
ما ينفعش أعيش مع واحد أنا مش عايزاه عشان كلهم بـ يقولولي ارجعيله.
أنا اللي كرهني فيه إني كنت بـ بقي تعبانة وهو ما بـ يهموش غير اللي هو عايزه.
عمره ما قالي كلمه حلوة، كان عايز واحدة ينام معاها وبس.
لما راح اتجوز عليا بقي كل يوم يعدي عليا ويقول إنه ما بيحبش غيري.
وبعد الطلاق بقي يشكر فيها ويقولي انتي كل همك الفلوس،
أيوا ما أنا عندي عيال لازم أطلب فلوس،
لكن هي ما عندهاش عيل … عايزة تتنيل وبس.
كان نفسي أنتحر بس لسه من المحاولة اللي فاتت معدتي واجعاني.
ساعات بفكر أمشي ولا حد يعرف أنا فين ولا رايحة فين.
بحس إني ماليش قيمة، ماليش لازمة.
طليقي بـ يقولي أنا سايبلك الشقة مش عشان العيال،
عشان تفضلي تحت عيني.
قولت له أنا هـ عيش حياتي وهـ تجوز،
قالي ساعتها هـ رميكي زي الخلقة المعفنة.
أنا اتجوز لأ، بس هو فيه واحدة قدامه عيله صغيرة وبـ يشورني قبل ما يتجوزها!
أخواتي راميني ما بـ يسألوش فيا، الطلاق ده عندهم كأني عملت عملة،
زعلانين عشان ما كـبـرتـهـمش وقـولـتلهم إني هـ تطلق،
وهم لو كبرتهم كانوا هـ ياخدوا عيالي مني، أكبرهم واخسر عيالي؟
هم ما يهومنيش أنا اللي يهمني عيالي،
أنا كأن أخواتي ماتوا ومش هـ كبرهم تاني.
أنا نفسي في راجل كويس يديني الحنان بمعني كلمة الحنان.
أنا بحس إني لسه صغيرة … زي بنتي
آه أنا لسه صغيرة وهـ عيش حياتي، ومش هـ يهمني حد.
أنا لو عايزة أقلع النقاب هـ قلعه، أنا صعيدية ودماغي ناشفة.