اتجوزت وانا 31 سنة
ما كنتش أعرفه، كان جواز صالونات

كان متجوز ومطلق وعنده 3 عيال من مراته القديمة
يوم الفرح كان يوم غريب
كلمته من الكوافير عشان ييجى قالي إيه ده هو انهارده الفرح؟

ولما جه ياخدني ما دفعش باقى فلوس الكوافير وانا استلفت ودفعتهم
رحنا اتصورنا والطرحة وقعت ونسيت المروحة بتاعة إيدى
و العربيه اللى كنت راكبة فيها باظت ..

أخته ليلة الدخلة قالتلى: بصى يا بنتى خديها نصيحة منى ما تخـلـفـيـش على طول
أول ما وصلنا البيت دخل على أوضة النوم وقلع وقعد بالفانلة والكلوت
أنا خرجته من الأوضة وقفلت الباب عليا
قعد يخبط ويقولى افتحى، قولتله أنا ما بـغـيـرش قدام أمى هــ غــير قدامك؟!
بعدين قال ما بدهاش بقى وراح داخل
وجيت أدور على منديل العروسة ما لاقيـتـهـوش قام جاب حتة بفته!

لما حملت سأل حملتى منين!
منين إيه لا مؤاخذة؟ ويعنى إيه مش عارف ...
قولتله: مش علشان مراتك الأولانية خانتك مع صاحبك يبقى أنا كمان بخونك
أنا لما قالى كده فضلت ألطم وأصوت
كده معناها إنى نمت مع حد تانى؟
أنا ما اتجوزتش غيرك وما نمتش غير معاك!

كان بـ يضربنى على حاجات تافهة ...
مرة وانا حامل قبل ما أعرف إنى بقيت حامل كنت سقعانة وبـ ترعش
وكنا فى عز الصيف فى شهر 7
فـ نمت فى الأوضة واتغطيت
ليه وليه ما قـمتـش عملت لعياله سندويشات المدرسة!
شتيمه ويا بنت و يا بنت ويا بنت
وضرب فى الأوضة
وبعدين جرجرنى كمل عليا فى الصالة وخبطنى فى النيش
وكل ده ليه؟ علشان ما قـمـتـش عملت سندويشات لعياله من مراته القديمة!

مرة سألته هو أنت متجوزنى ليه؟! كماريره لعيالك؟!
قالى: خدامة ليا ولعيالى وخدامة لمزاجى
قولتله أنا لو خدامة أولى أخدم أمى العيانة
أنا لو بـ عمل ده فأنا بعمله علشان بـ تقى ربنا فيكوا
لكن أنا مش خدامة لحد

بس اللى خلانى أسيب البيت فالآخر هو لما ابنه من مراته الاولانية حاول يتهجم عليا …
خفت على نفسى
لأنى عارفة إن لو حصل ده تانى وما قدرتش أمنعه
جوزى مش هـ يصدقنى وهـ يقول إن أنا السبب

بعد ما سبته قلت أنزل أشوف شغل
دورت على شغل فى المستشفيات
عاوزين ممرضات بس وانا ماليش في التمريض
عماله ادور علي شغل ومش لاقيه
حاسه ان الدنيا اسودت في وشي

السن ايه يا مدام؟ 36؟ ! لأ ما ينفعش
طب مؤهلاتك إيه؟ دبلوم صنايع … ما بـيرضوش!
يعني لا العلام نافع ولا السن نافع طب اعمل ايه طيب
ليه بتسدوها في وشي !
حتي النفقة اتمنعت عشان جوزي ساب الشغل
أصل أنا خايبه سمعت كلام جوزي لما قالي: اقعدي مالشغل
وانا هـ خليكى تكملى فى الجامعة وهـ صرف عليكي
بس بعد ما اتجوزنا قالي: أحا هـ ديكي ليه؟ انت مش بتاكلى وبتشربى؟خلاص!

كان نفسى أكمل تعليمى واخش كليه إعلام وابقي مذيعة
واعرف أعيش ابنى عيشة كويسة
أخويا الكبير يقولى: اقعدى الواد محتاج رعاية، وأخويا التانى يقولى اشتغلى
والله الواحد ما عارف يعيش
أفضل أناقر فى ابنى وابنى يناقر فيا
واقوم أنضف الشقة وهو معايا
نلعب بالميه اغرقه يغرقني
بعدها بفك
لو الزمن رجع بيا ما كنتش خدت جوزي
بس أرجع واقول وابنى كان هـ يجى منين