كنت بـ كره موضة اللو رايز جينز
ما كـنـتـش بـ عرف أدخل جواها
وكنت بـ ضطر إني يا إما ألبس حاجة طويلة أوي، تداري الهانش من ورا
-وكانت بـ تخليني شكلي زي البلوكة كده-
أو إني أربط حاجة حوالين وسطي
فـجالي وقت كنت دايمًا رابطة حاجة حوالين وسطي
ولو وقعت أو اتحركت، كنت أرتبك، واحس إني عريانة.

وكان في ناس سخيفة تسألني: "أنتِ ليه دايمًا رابطة حاجة على وسطك؟"
وفي المدرسة، أصلًا كان ممنوع إني أعمل كده
وكان لازم ندخَّل القميص من جوا بنطلون قَصِته مخلياني قد التربزين
كنت بـ حاول أتهرب، أو أطلَّع القميص من برا

بس لو حظي جه في مدرس في الكوريدور، لازم في ساعتها أدخَّل القميص جوا بسرعة
فـ جـيبـت شنطة باك باج طويلة، وطوِّلت حبلها عالآخر بحيث إنها تـنزل تـداري كل حاجة
وبـقـيـت مش بـ قلعها.

وكانت الناس مش فاهمة، وفي أوقات تحاول تـخفف عني
"ممكن تـ حطي شنطتك هنا على فكرة"
أو "حرام، أنتِ شايلة الشنطة من الصبح، اقلعيها شوية"
وانا بقى وشي يـحمر ويـخضر، واتـبِّـت في الشنطة وانا مش عارفة أعمل إيه
"مش عايزة أقلعها".

وساعتها اكتشفت حيلة تانية؛ جاكيت
بس المشكلة إن ساعات الدنيا بـ تبقى حر أوي
وحتى لو أنا استحملت، الناس الـلـي حواليا كانوا دايمًا بـ يسألوا: "أنتِ مش حرانة؟"
وبدل ما اَشَـتِـت الناس عن هنشي العجيب، بـقـيـت بـ لفت نظرهم لشيء أعجب.

وبطلت ألبس جينز، وقـلـلـت أوي في لبس البنطلونات لمدة 7 سنين
وفاكرة أول مرة اتجرأت ولبست جينز تاني، كنت بـ ترعش من الخوف
حسيت إني هـ تحول لواحدة تانية، واحدة مش عاجباني، واحدة بـ كرهها، واحدة دمرت مراهقتي.