أنا أقرب واحدة ليكِ
بس في اللحظة دي، كنت جغرافيًا، قاعدة في أبعد مكان عنك
البروتوكول هو إن الأهل بـ يقعدوا أقرب للعروسة من الأصحاب
كنتِ جوا دايرة كبيرة في صالون
وناس حواليكي بـ يقولوا كلام رسمي
وأنا قاعدة ورا… برا الدايرة
زي اللي قاطع تذكرة بلكون
كُنت حاسة إني المفروض أبقى جنبك
إيدي على كتفك
كنت حاسة بكل حاجة انتِ حاساها
كنت حاسة بخوفك، بفرحتك، وبكسوفك،
وعايزة أدخل أساعدك، بس ممنوع
فجأة اترسم ما بيننا خط
كأننا بقينا في عوالم مختلفة
إحساس كنت مش بـ حسه خالص وأنا وانتِ لوحدنا
بس أول ما كانت الناس بـ تدخل في المعادلة
كانوا بـ يرسموا الخط ده بيننا باحتياجهم الكبير إنهم يقولوا:
"عقبالك"
كإنهم بـ يقولوا لي: "عقبالك لما توصلي لبر الأمان"
"عقبالك لما تكبري "
"عقبالك لما تنجحي"