بعد 12 يوم جواز لاقيته بـ يضرب وبـ يشـتـم وبـ يقل أدبه، كلمت أخوه،
قالي الكلمتين بتوع هـ يكبر ويتغير واصبري.
في الاول كنت بـ تبع الأصول،
إنى أشتم وامد إيدي كان بالنسبة لي حاجة كبيرة،
لأني اتربيت علي إن الراجل حاجة محترمة
لكنه استمر في ضربه ليا …
كان في الشارع ممكن يضربني ويشتمني، ومرة عورني في وشي من غير سبب
انت اللي بـ تبدأ وانت اللي بـ تضرب وانت اللي بـ تنهي
قالي أنا أخدتك عشان انت مكسورة الجناح،
عشان كنت متجوزة واتطلقت.
ضرب وشتيمة،
أصلي يخرجني مـالصلاة، أقرا قرآن يسحب مني المصحف،
آجي أتكلم معاه ونتفق علي حاجة ألاقيه ناسيها.
من هنا عرفت إنه بـ يشرب مخدرات، كنت بـ شم في بقه ريحة سجاير،
وانا بكره السجاير، بكرهها وبقرف منها.
ولما كنت أسأله كان يقولي: "أصلي قابلت واحد صاحبي وبوسته"
يعني انت بوسته من بقه؟!
يعني كان بـ يكدب، ما كانش قادر يواجهني، ويقولي أنا بشرب سجاير.
كنت بـ حس إنه مش راجل عشان مش قادر يواجههني، إيه الجبن ده
كنت بـ تبع الأصول لحد موقف حصل لما كنت حامل فى الشهر التاسع،
موقف مش قادرة أنساه.
كنا عند أمه وبـ نـتـخـانق، وابن أخوه كان موجود، وكان بـ يحوشه عني ومش قادر عليه
كان زي التور الهايج محدش يعرف يلمه،
وانا مش عارفة أنا عملت إيه عشان كل ده،
انت بـ تعمل كده ليه؟ إيه النقص ده؟!
ولدت وقمت واستعدت صحتي، فبقي يشتم أشتم، يضرب أضرب
وكنت بـ تملك منه لما يرميني عـالسرير ويضربني، فانا أضربه برجلي.
وفضلت علي كده
ولما كان بـ يقولي حاجة كنت بـ قوله أكتر منها.
يقولي أبوكي كذا، أقوله أبوك وأمك، وكل عيلتك كذا.
أنا كنت بـ حتقر نفسي لما بـ عمل ده بس وبعدين؟
لكن تعبت.
أنا كنت عارفة إن أهله ربوه غلط بالضرب والإهانة.
كلهم كانوا بـ يضربوه، كان ملطشة البيت، فكان واخدني ملطشته.
كان بـ يقولي: "انت خدامة هنا"، و"انت حمام بالنسبة لي"
نفسي أخد حقي منه ومش عارفة،
جوايا أحاسيس كتير وحشة مش عارفة أطلعها.
لو كل واحدة لقت جوزها بـ يعمل فيها كده سابته، ما كناش احنا قابلنا الاشكال دي
أنا بالنسبة لي الخلع ده أحسن قانون طلع،
أنا مش عايزة منك فلوس، بس هـ تصرف عليا وعلي ابني غصب عنك.
ده غير بقي يا دكر إنه هـ يتكتب لك في القسيمة مخلوع،
والقاضي هو اللي هـ يطلقني مش انت،
وانا ما يفرقش معايا الناس.
أمي معاشها 470 جنيه 300 منهم بـ يروحوا للدوا، والباقي ايجار ونور.
أكلنا وشربنا أخويا هو اللي بـ يجيبه، لكن معظم أيامنا بـ نقضيها كده.
واديني بـ شتغل في الإكسسوار، وبجيب لأبني بامبزه.
أنا بس مش عايزة ابني يعيش يتيم، وأبوه عايش.
مش انت تتبسط وتنام معايا، ولما يجيلك عيل ترميه وتمشي.
من أسبوعين جه خد الواد كان بقاله 4 شهور ما شافهوش،
وهو مرجعه بعت معاه 200 جنيه،
4 شهور ما شافوش وباعت معاه 200 جنيه!
هو لسه لحد دلوقتى جوزى وعايز نرجع،
أنا صبرت كتير واديتله فرص كتير إنه يتعدل معايا، بس هو ما اتغيرش.
أنا عارفة من جوايا إنه مش هـ يـتـغـيـر.
ده كنا نبقي متخانقين ويقولي قومي اعملي الأكل،
وانا كرامتي كانت بـ توجعني فمرة كنت بـ برطم بكلمتين،
يقوم جاررني كده وراميني عالسرير، وبإيده علي دماغي بتاع ٣٠ مرة،
لدرجة إني حسيت فعلا إني بموت.
ومرة تانية راح ساحبني من رجلي، ووقعت برأسي علي سن السرير.
وبعدين علي الأرض وأقلام من اللي هي بـ تصفر الدماغ، والحاجات دي.
وبعد كل ده ممنوع تعيطي، ولا تزعلي، ولا تفكري أصلا.
ممنوع تاخدي موقف.
لسه محتارة أرجع ولا لأ ...
خايفة من كل اللى بسمعه ده …
خايفة ما يبقاش عندى شقة …
خايفة إن ابنى يبقى محتار بينى وبين أبوه
ابنى ولد ومحتاج أبوه مش بنت هـ تكتفى بيا.
خايفة من نظرة المجتمع،
انا اتجوزت قبل كده واتطلقت،
واحنا في مجتمع دايما شايف إن الراجل هو اللي صح،
حتي لو زني برا محدش هـ يكلمه.
بس ده ضربني وانا حامل في الشهر التاسع، وابن اخوه هو اللي حاشه
ده كان بـ يعورني في وشي ….أرجعله ليه؟!