أكتر مرة فاكراها لما خالي ضربني بسبب أمي.
أمي من النوع الـلـي تخلي الواحد يشب ويلب كده.
كانت مرات عمي عمالة تشتم في أمي وأمي ساكتة
جيت أتكلم، أمي قالت لي: "ما تـرديـش"
ما عـرفـتـش أسكت، قولت لمرات عمى: "أنتِ بــ تـشـتـمي أمي كده ليه؟"
أمي تسكت؟ لا
أول ما راحت على بيت أبوها، قالت لخالي:
"عاوزهم يجولوا في البلد إني ما عرفتش أربى البنات،
وأنت عارف إن رباية البنات على أمهم"
خالي كان عنده شقة فوق، قال لي: "تعالي نسقي الزرع"، طلعت معاه.
أتاريه جايب خرطوم، وتانيه نصين،
وخدت علقة قعدت 3 أيام راقدة فى السرير
ومن ساعتها كل ما أشوف زرع افتكره
ومن ساعتها بـ خاف من الزرع والضلمة.
بـ ضرب مين؟
ما بـ ضربش حد غير عيالي
نهى دي ممكن ألف شعرها بإيدي، وآخدها لحد البيت
وعندي خرطوم بـ تـنـيـه اتنين، واضرب نهى وسارة
بس الـلـي نفسى أضربه بجد هو أخويا
واخد مني كتير، ومش عارفة آخد منه حاجة
يـ يجي بيتي، يـتـنِّـك، و"إيه الشقة دي"، و"إيه العفش ده".
ويوم ما روحت البلد طلبت منه 2000 جنيه فضحني، وضربني، ورجعني من نص الطريق
ويقول لي: "كل واحدة بـ ترتاح من جوزها، لما ترتاحي أديكي"
أنا نفسي أمسكه أضربه
كل ما الدنيا تضيق بيا، أدعي واقول ربنا يديله الصحة وطولة العمر
لحد ما يشوف ولاده الصبيان بـ يعملوا في بناته كده ويحس بوجعهم.