إحنا مختلفين عنكوا، مش عشان إحنا صغيرين وإنتوا كبار
مش عشان الـ generation gap، بس عشان إحنا مش إنتوا
إحنا ناس غيركوا، مقتنعين مش مقتنعين، قابلين، رافضين.

طيب ليه أنا متضايقة، ومزعلة نفسي؟
عادي، بـ تحصل في كل بيت
لأ بقى، دي مشكلة
بس من كتر برودي، ما بـ قـيـتـش مشكلة، وأصبحت حل
وحاجة حلوة أوي كمان.

ليه يا ماما أنتِ متاكدة إن مستقبلي زيك بالظبط؟
طيب ليه ما تـقوليش الحمد لله إن أنا شوفت غلطاتك، واتعلمت منها
ليه متأكدة إني هـ تجوز بدري زيك، و"اتوكس"؟
(ده زي ماما ما بـ تقول)
ليه متأكدة إني هـ تخرج واقعد في البيت؟
ليه متأكدة إني زيك؟
مع العلم إن مجموعي في الثانوية العامة أعلى منك بـ 18 %؟
ليه مخوفاني كده؟
دي مانعاني اتجوز، وبـ تتكلم بجد
ليه؟ مش يمكن أتجوز، وأعيش مبسوطة؟

يا أمي المشكلة إنك مش عارفة تـعيشي مبسوطة،
مش عارفة تـرضي،
وليه أنا بـ عرف أرضى؟
آه، مش أنا راضية بتفكيرك، وساكتة إني بـ عرف أعيش وارضى؟
والأهم، إني ما بـقـيـتـش مكاني؟

الحمد لله، بـ عرف أتقدم، ده لو ما مـنـعـتـنـيـش
ليه مخوفاني كده؟
طيب مش أنا بـ قول إن المشكلة أصبحت حل، وحاجة حلوة
والحياة بمبي، فين ده؟
أهو أنا هـ تخرج، واشتغل، واتعب
وأخلص كل صحتي في مستقبلي
وهـ تجوز، وأخلف، وأربي عيالي صح، وهـ رضى، وهـ كون أحسن منك
ومستقبلي أحسن لأني عرفت إزاي أربي عيالي
وهـ ربيهم عكس ما ربـيـتـيـنـي، هـ قولهم ده صح، وده غلط
وده بـ يقربنا لربنا، وده بـ يبعدنا عنه
وهـ راقبهم، ومش هـ تهاون لو غلطوا، بس مش هـ عذبهم
وهـ صقف لهم لما يعملوا حاجة صح، وهـ قسم وقتي صح، ومش هـ كسل.

فـ هـ ييجي اليوم الـلـي ولادي يصقفوا لي فيه، وجوزي كمان
وأنتِ لازم تصقفي لي، وتقولي لي لمرة في حياتك:
"بحبك يا بنتي"
"عرفتي تربي".