فصلونا عن بعض، البنات في فصل، والولاد في فصل.
أنا قولت أحسن برضه عشان يشرحوا، ونسأل براحتنا، ونفهم.
لكن جت ميس أمنية بعد ما شرحت النص الفوقاني قالت:
"خلاص، أنتوا كده كده قريتوا الدرس لوحدوكوا في البيت".
مستر سعيد كان بـ يمسح عرقه بعد ما شرح لنا الستات ليه بـ يجي لهم البيريود،
وفاكرة إني كنت قاعدة أنا ووسام، وقدامنا محمد زين، وأنور.
قام أنور اتدور، وقال لي: "يعني أنتوا بـ تبقوا قاعدين، وفجأة يحصل بوم في بطنكوا؟"
بس أنا ما كنتش فاهمة حاجة خالص،
ولما جت لي افتكرت إني اتعورت.
فصلونا عن بعض
2012