كنت بنت عندي 13 سنة،
أهلي كانوا قاسيين عليا شوية، بس دول أهلى، ومهما حصل ما أقدرش استغني عنهم.
لما كبرت عرفت إنهم حتى ما يصلحـوش يكونوا أسرة سوية….
اتعرضت لعنف من أمي ومن أبويا، أنا وأخواتي.

أفتكر أول مرة ضربني فيها كان عندي 12 سنة، وكنت لسه في بداية المراهقة،
اتضربت عشان عرفت ولد من على الفيسبوك،
واتكلمنا، وماما لما سألتني عليه قولتلها الحقيقة.
وعدتني إنها مش هـ تحكي لبابا، بس هي حكتله،
استـنى لما أمي نزلت الشغل، وجاب الحزام والكوبايات،
وأي حاجه تتخيلوها ممكن اتضرب بيها….
ده حتى قعد عليا، وضربني، مع العلم إن بابا تخين جدًا، وخنقني.

لحد دلوقـتي فيه علامات في جسمي بسبب ضربه ليا….
كان رد فعل والدتي أول ما جت من الشغل: "حرام عليك"، بس،
لا زعقت، ولا اتخانـقت، ولا عملت أي حاجة،
وفي نص اليوم قالت لي: "كُلي"، قولتلها: "لأ، مش عايزة"،
قامت ضربتني، وقالتلي: "أحسن تستاهلي عشان تـبطلي وساخة".
دي كانت أول مرة، بس ما كانـتـش آخر مرة.

ياما اتضربت بنفس الأسلوب، ويمكن أسوأ….
مرة عشان ما روقـتـش لماما، وكنت بـ ذاكر،
مرات عشان أتأخرت مثلًا برا في الدروس،
ومرات، ومرات من غير أي سبب.

كان بـ يجري ورايا في الشقة ويـضربني،
يشد شعري لحد ما شعري يـتـقطع في إيده.
مرة من المرات دي فضلت 20 يوم في البيت مش عارفة أنزل إزاي لدروسي.

وما اقتصرش على كده بس،
بابا بقيت ألاقيه بـ يتسحب أو يلاقي أي حجج عشان ينام في أوضتي أنا وأخواتي البنات،
ويختلف أي حجة عشان ينام جنبي،
كنت بـ قلق بالليل، ألاقيه بـ يحسس على جسمي، وبـ يحك جسمي في جسمه.
لما قولت لأمي، قالت لي: "أنتِ وسخة، وعايزة ترمي وساختك على أبوكي".

أفتكر إن أمي كانت دايمًا تاخد مفتاح أوضتي؛ عشان كنت بـ قـفل على نفسي بالليل واحنا نايمين.
لما جبت كالون جديد اعتبروني مش محترمة،
إزاي أجيب كالون جديد -عشان أحمي نفسي- من غير ما أقولهم؟ وخدت علقة يومها.
لما جبت ترباس، وقولت أركبه، أبويا حلف لو ركبته هـ يرميني في الشارع،
قالي: "لو ركبتيه هـ خليكي تقلعي ملط، واطردك برا البيت"،
بس أنا ركبته وهم مش موجودين، وخدت علقة، بس مش مشكلة.

من يومها وهو ما بـ يقربش جنبي،
بس الـلـي عرفته مؤخرًا إنه لمس صدر أختي الـلـي عندها 13 سنة.
أختي حكتلي وهي بـ تعيط،
ما قدرتـش اتكلم، ولا حتى عرفت أقولها إيه؛
لأن أنا وهي تقريبًا عايشين في نفس القرف.

أي مشكلة بـ نتضرب، ونتهزق، ويجروا يجـيـبوا السكينة، ويهددونا.
لو زقيت أمي وانا بـ تضرب، تقولي: "أنتِ اتـجنـنـتي؟ بـ تمدي إيدك عليا؟"
أنا كل الـلـي بـ عمله إني بـ دافع عن نفسي.

أنا دلوقتي كبرت، ودخلت الجامعة،
ولسه الخناقات والقرف مستمر.
بس أنا مش عايزة أقعد في البيت أكتر من كده،
منظر أخواتي وهم بـ يتهانوا قدامي كل يوم ولا أكنهم حيوانات، بـ يقطعني.